ក្រុមពេទ្យជំនាញព្យាបាលជំងឺកូវីដ១៩របស់ចិន នឹងមកដល់ប្រទេសកម្ពុជា ថ្ងៃស្អែកពេលព្រឹក

យោងតាមការបញ្ជាក់ពីទូរទស្សន៍ជាតិកម្ពុជា ទទក នាព្រឹកថ្ងៃទី២២ ខែមីនា ឆ្នាំ២០២០ បានឲ្យដឹងថា ក្រុមគ្រូពេទ្យជំនាញព្យាបាលជំងឺកូវីដ១៩នៃប្រទេសចិន នឹងមកដល់ព្រលានយន្តហោះអន្តរជាតិ​ភ្នំពេញ ច្រកវីអាយភី នៅវេលា​ម៉ោង០៨ និង៣០ព្រឹក ថ្ងៃទី២៣ខែមីនាឆ្នាំ២០២០ តាមជើងយន្តហោះពិសេស។ នេះជាក្រុមគ្រូពេទ្យជំនួយទីមួយរបស់ប្រទេសចិនទៅកាន់ប្រទេសអាស៊ាន ខណៈដែលជំងឺកូវីដ១៩កំពុរាតត្បាតក្នុងតំបន់ និងទូទាំងសកលលោកគួរអោយបារម្ភ។ ឯកឧត្ដម​ វ៉ាង​ វិនធាន ឯកអគ្គ​រដ្ឋទូតចិនប្រចាំកម្ពុជា និងឯកឧត្ដម​ រដ្ឋមន្រ្តី​ក្រសួងសុខាភិបាល​កម្ពុជា នឹងមានវត្តមានក្នុងពិធីបដិសណ្ឋារកិច្ចនៅព្រលានយន្តហោះ។

គួរបញ្ជាក់ផងដែរថា នៅរសៀលថ្ងៃទី១៩ ខែមីនា ឆ្នាំ២០២០នេះ ក្រសួងសុខាភិបាលកម្ពុជាបានទទួលជំនួយជាឧបករណ៍ពិនិត្យរកមេរោគកូវីដ១៩ ចំនួន ៣,០០០ឈុត ពីប្រទេសចិន ដែលឧបករណ៍នោះដើរតួនាទីយ៉ាងសំខាន់សម្រាប់បម្រើក្នុងការទប់ស្កាត់ និងការឆ្លើយតបការរាតត្បាតនៃមេរោគកូរ៉ូណាថ្មី (កូវីដ១៩) នៅក្នុងប្រទេសកម្ពុជា៕

អត្ថបទ៖ សេម

ប្រភព៖ ទូរទស្សន៍ជាតិកម្ពុជា ទទក