អាមេរិកកត់ត្រាកំណត់ត្រាស្លាប់ថ្មី ដោយមានអ្នកស្លាប់ក្នុងមួយថ្ងៃជិត ២,០០០នាក់
មនុស្សដែលបានឆ្លងវីរុស COVID-19 នៅសហរដ្ឋអាមេរិកជិត ២,០០០នាក់ បានស្លាប់ក្នុងរយៈពេល ២៤ ម៉ោងចុងក្រោយ នេះបើយោងតាមតារាងតួលេខរបស់សាកលវិទ្យាល័យចនហបគីនស៍ នៅថ្ងៃអង្គារទី៧ ខែមេសា។ តួលេខស្លាប់ប្រចាំថ្ងៃដែលមានចំនួន ១,៩៣៩ បាននាំឱ្យចំនួនអ្នកស្លាប់សរុបនៅសហរដ្ឋអាមេរិកគិតត្រឹមយប់ថ្ងៃអង្គារ មានដល់ ១២,៧២២នាក់ ដែលជិតស្មើចំនួនអ្នកស្លាប់នៅក្នុងប្រទេសអ៉ីតាលី ដែលមានអ្នកស្លាប់ចំនួន ១៧,១២៧នាក់ និងអេស្ប៉ាញដែលមានចំនួន ១៣,៧៩៨នាក់។
ប្រធានាធិបតីលោក ដូណាល់ ត្រាំ បានការពារការឆ្លើយតបរបស់លោកចំពោះវិបត្តិនេះ ហើយកាលពីថ្ងៃអង្គារ គាត់បានស្តីបន្ទោសអង្គការសុខភាពពិភពលោក (WHO) ចំពោះប្រតិកម្មយឺតៗ។ លោកបានចោទសួរថា ហេតុអ្វីបានជាអង្គការសុខភាពពិភពលោកបានផ្តល់អនុសាសន៍មិនត្រឹមត្រូវបែបនេះ? ដោយសំដៅលើការណែនាំរបស់ WHO កាលពីចុងខែមករា ដែលថាប្រទេសទាំងអស់គួររក្សាព្រំដែនឱ្យបើកចំហ ទាំងដែលការពិតវាកាន់តែរីករាលដាលកាន់តែខ្លាំង។
លោក ដូណាល់ ត្រាំ បានចោទថា WHO បានយឺតពេលក្នុងការហៅវីរុស COVID-19 ជាវីរុសរាលត្បាតជាសកល (pandemic) ហើយថា WHO មើលទៅតែខាងចិន ទាំងដែលអាមេរិកផ្ដល់ជំនួយច្រើនជាងគេ។ ដូច្នេះអាមេរិកក៏នឹងកំពុងគិតថា នឹងឈប់ផ្ដល់ជំនួយឱ្យ WHO ផងដែរ៕
The W.H.O. really blew it. For some reason, funded largely by the United States, yet very China centric. We will be giving that a good look. Fortunately I rejected their advice on keeping our borders open to China early on. Why did they give us such a faulty recommendation?
— Donald J. Trump (@realDonaldTrump) April 7, 2020
អត្ថបទ៖ លីដា
ប្រ៖ភព៖ CNA