ក្រោយមានមនុស្សពុលស្លាប់ជាច្រើននាក់ សមត្ថកិច្ចប្រមូល និងដកហូតស្រាថ្នាំចិនសែ តាំងគួយ បានជាង៨០០ដបនៅខេត្តបាត់ដំបង
បាត់ដំបង៖ កាលពីថ្ងៃ ពុធ ១២រោចខែជេស្ឋឆ្នាំជូតទោស័ក ព.ស.២៥៦៤ត្រូវនឹងថ្ងៃទី១៧ ខែមិថុនា ឆ្នាំ២០២០ ដោយបានការអនុញ្ញាតពីឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង លោកឧត្តមសេនីយ៍ត្រីចេង ឡេង ស្នងការរងផែនការងារប្រឆាំងបទល្មេីសសេដ្ឋកិច្ចនៃស្នងការដ្ឋាន បានចាត់តាំងលោកវរសេនីយ៍ទោ យី យក់សាន នាយកការិយាល័យនគរបាលប្រឆាំងបទល្មេីសសេដ្ឋកិច្ច បានចាត់តាំងដឹកនាំឱ្យកម្លាំងក្នុងការិយាល័យចុះធ្វេីការត្រួតពិនិត្យកន្លែងលក់ស្រាថ្នាំចិនសែនៅក្នុងស្រុកសំពៅលូនខេត្តបាត់ដំបង បន្ទាប់ពីមានករណីប្រជាពលរដ្ឋបានរងគ្រោះរហូតបាត់បង់ជីវិតផងក្រោយពីបានទទួលទានស្រាថ្នាំចិនសែដែលមានយីហោ(តាំងគួយ)នាពេលកន្លងមក។
កិច្ចប្រតិបត្តិការនៅក្នុងស្រុកសុះពៅលូន សមត្ថកិច្ចបានប្រមូលរក្សាទុកនូវស្រាថ្នាំចិនសែយីហោ(តាំងគួយ)មានចំនួន ៦៨យួរ ស្មេីចំនួន៨១៦ដប។
ជាមួយនឹងសកម្មភាពចុះប្រមូលដកហូតស្រាថ្នាំចិនសែយីហោ (តាំងគួយ)នេះក៏សូមអំពាវនាវដល់បងប្អូនប្រជាពលរដ្ឋ មេត្តាបញ្ឈប់ជាបន្ទាន់ការទទួលទានស្រាថ្នាំចិនសែយីហោមួយនេះ ព្រោះវាបានបង្កឱ្យមានករណី(ពុលស្លាប់)យ៉ាងពិតប្រាកដ៕
ប្រភព៖ ស្នងការដ្ឋាននគរបាលខេត្តបាត់ដំបង