ខឹងឧស្សាហ៍ជេរមកលើក្រុមខ្លួនញយដឹងពេក ទាញដាវកាប់បណ្តាលឲ្យរងរបួសធ្ងន់តែម្តង
ភ្នំពេញ ៖ បុរសម្នាក់ត្រូវបានឃាត់ខ្លួនប្រគល់ឲ្យសមត្ថកិច្ច បន្ទាប់ពីប្រើដាវកាប់ទៅលើជនរងគ្រោះបណ្តាលឲ្យរងរបួស ។ ហេតុការណ៍នេះកើតឡើងកាលពីថ្ងៃទី២៨ ខែមិថុនា ឆ្នាំ២០២០ វេលាម៉ោង១៨:៣០នាទី ត្រង់ចំណុចការដ្ឋានសំណង់ផ្ទះល្វែង(ទ្រី គឹមម៉េង)ស្ថិតនៅខាងជើងវត្តត្រពាំងសាលា ភូមិត្រពាំងសាលា សង្កាត់ពង់ទឹក ខណ្ឌដង្កោ រាជធានីភ្នំពេញ ។
ជនរងគ្រោះឈ្មោះ ពេជ្រ សុខា ភេទប្រុស អាយុប្រហែល ២៥ឆ្នាំ កម្មករសំណង់ ស្នាក់នៅផ្ទះជួលស្ថិតនៅភូមិត្រពាំងសាលា សង្កាត់ពង់ទឹក ខណ្ឌដង្កោ រាជធានីភ្នំពេញ។ ឃាត់ខ្លួនជនសង្ស័យ០១នាក់ឈ្មោះ ពៅ ម៉ៅ ភេទប្រុស អាយុ ២០ឆ្នាំ មុខរបរកម្មករសំណង់ ស្នាក់នៅភូមិត្រពាំងសាលា សង្កាត់ពង់ទឹក ខណ្ឌដង្កោ រាជធានីភ្នំពេញ ។
សេចក្តីរាយការណ៍បានឲ្យដឹងថា កាលពីថ្ងៃទី២៨ ខែមិថុនា ឆ្នាំ២០២០ វេលាម៉ោង១៨:០០នាទី ជនរងគ្រោះបានដើរម្នាក់ឯងដោះអាវ មកកន្លែងជនសង្ស័យធ្វើការ ហើយស្រែកសួររកអ្នកជេរខ្លួន(ជនរងគ្រោះ) ឮដូច្នេះជនសង្ស័យដែលខឹងជនរងគ្រោះឧស្សាហ៍ជេរមកលើក្រុមខ្លួន ក៏យកដាវកែច្នៃដែលខ្លួនលាក់ទុកក្បែរខ្លួនកាប់ទៅលើជនរងគ្រោះតែម្ដង។ បន្ទាប់ពីកើតហេតុភ្លាមៗ ជនរងគ្រោះត្រូវបាននាំទៅមន្ទីរពេទ្យរុស្សី និងបានចាប់ខ្លួនជនសង្ស័យដឹកតាមផាសស្អាប់យកមកប្រគល់ជូនសមត្ថកិច្ច និងដាក់ពាក្យបណ្តឹងនៅប៉ុស្តិ៍នគរបាល រដ្ឋបាលពង់ទឹក ដើម្បីឱ្យសមត្ថកិច្ចធ្វើការតាមនីតិវិធីច្បាប់ ៕
ប្រភព៖ ស្នងការដ្ឋាននគរបាលជាតិ