ខួបកំណើតកូន ជួបជុំផឹកស៊ី ចាក់ធុងបាស់ ដល់ម៉ោង ១១ យប់ជាង រំខានប្រជាពលរដ្ឋសំរាក ពេលសមត្ថកិច្ចទៅណែនាំ ស្រាប់តែមិនស្តាប់ និងរករឿងសមត្ថកិច្ចវិញ ឥលូវនេះ​ចូលខ្លួនសុំទោសជាសាធារណៈ
ព័ត៌មានជាតិ June 30, 2020 Khmernote

ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សូមធ្វើការបំភ្លឺ និង បកស្រាយជូនសាធារណ:ជនឲ្យបានជ្រាបទាក់ទងទៅនឹងករណីសមត្ថកិច្ចចុះណែនាំអប់រំ និងបញ្ឈប់សកម្មភាពផឹកស៊ី ចាក់ធុងបាស់ ច្រៀងឡូឡា បង្កសម្លេងរំខានដល់អ្នកជិតខាង។ ជាភារកិច្ចជាប្រចាំរបស់ក្រុមការងារព័ត៌មាន និងប្រតិកម្មរហ័សដែលតាមដាន ឆ្លើយតប និងមានវិធានការណ៍ចុះដល់ទីកន្លែងដើម្បីដោះស្រាយបញ្ហាជូនប្រជាពលរដ្ឋភ្លាមៗ

នៅយប់ថ្ងៃទី២៩ ខែមិថុនា ឆ្នាំ២០២០ វេលាម៉ោង ២៣:១០នាទីយប់ បន្ទាប់ពីទទួលបានទូរស័ព្ទប្តឹងពីប្រជាពលរដ្ឋថាមានករណីជួបជុំ ផឹកស៊ី ចាក់ធុងបាស់ បង្កសម្លេងរំខាន នៅផ្លូវ៤៩០ កែងផ្លូវ១៣៥ ភូមិ០២ សង្កាត់ផ្សារដើមថ្កូវ កម្លាំងប៉ុស្តិ៍នគរបាលរដ្ឋបាលផ្សារដើមថ្កូវចំនួន២នាក់ បានចុះដល់ទីតាំងភ្លាមៗ ដើម្បីធ្វើការណែនាំអប់រំ និងបញ្ឈប់សកម្មភាពរំខាននេះ។

ប៉ុន្តែក្រុមជួបជុំផឹកស៊ីមានគ្នាប្រហែលជា ៣០នាក់ ក្នុងស្ថានភាពស្រវឹងខ្លាំង ដែលកំពុងផឹកស៊ី ចាក់ធុងបាស់ ឡូឡា បង្កសម្លេងរំខានដល់អ្នកជិតខានមិនអាចសម្រាកបាន មិនត្រឹមតែមិនស្តាប់តាមការណែនាំរបស់សមត្ថកិច្ច ថែមទាំងប្រើប្រាស់សម្តី និងកាយវិការមិនសមរម្យមកលើសមត្ថកិច្ច ហើយថែមទាំងចាប់ក្របួចកអាវរកវាយសមត្ថកិច្ចទៀតផង៕ ប្រភព៖ ស្នងការដ្ឋាននគរបាលរាជធានីភ្នំពេញ