កាត់ឈ្មោះយានយន្ត ដែលរកម្ចាស់ដើមមិនឃើញ ក្រសួងពន្យារពេល០៣ខែទៀត រហូតដល់ចុងខែកញ្ញា ឆ្នាំ២០២០

រាជធានីភ្នំពេញ៖ យោងតាមការបញ្ជាក់នៅលើបណ្តាញសង្គមហ្វេសប៊ុកផ្លូវការរបស់ ក្រសួងសាធារណការ និងដឹកជញ្ជូន បានធ្វើការប្រកាសនៅព្រឹកថ្ងៃទី០១ ខែកក្កដា ឆ្នាំ២០២០នេះថា ការផ្ទេរកម្មសិទ្ធិយានយន្ត រកម្ចាស់ដើមមិនឃើញដែលត្រូវបិទបញ្ចប់នៅថ្ងៃទី៣០ ខែមិថុនា ឆ្នាំ២០២០ ឥឡូវនេះក្រសួងបានពន្យារពេលបន្ថែម៣ខែទៀតរហូតដល់ចុងខែកញ្ញា ឆ្នាំ២០២០វិញ។ ការសម្រេចពន្យារពេលនេះ ដើម្បីឲ្យម្ចាស់យានយន្ត ដែលបានទិញលក់តៗគ្នា រកម្ចាស់ដើមមិនឃើញអាចដាក់ពាក្យស្នើសុំបង់ពន្ធប្រថាប់ត្រាផ្ទេរកម្មសិទ្ធិ យានយន្តមកជា របស់ខ្លួនបាន៕