YouTuber ដ៏ល្បីឈ្មោះ លោក Jake Paul ត្រូវបានភ្នាក់ងារ FBI និង SWAT ចាប់ខ្លួនដល់ផ្ទះ ទាក់ទងនឹងករណីលួច និងបំផ្លិចបំផ្លាញទ្រព្យសម្បត្តិ នៅរដ្ឋអារីហ្សូណា

ភ្នាក់ងារ FBI និងមន្ត្រី SWAT រាប់សិបនាក់ បានវាយឆ្មក់ចូលក្នុងវិមានរបស់តារា YouTube គឺលោក Jake Paul (ជេក-ផល) និងបានរឹបអូសយកអាវុធរបស់គាត់ជាច្រើន បន្ទាប់ពីគាត់ត្រូវបានគេរកឃើញថា មានជាប់ពាក់ព័ន្ធនឹងការលួចនិងការបំផ្លិចបំផ្លាញទ្រព្យសម្បត្តិ នៅឯផ្សារទំនើបមួយនៅរដ្ឋអារីហ្សូណា។ ការិយាល័យភ្នាក់ងារស៊ើបអង្កេតបាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា៖«FBI កំពុងធ្វើការស៊ើបអង្កេតលើការចោទប្រកាន់ពីបទឧក្រិដ្ឋ ជុំវិញឧប្បត្តិហេតុនៅឯ Scottsdale Fashion Square ក្នុងខែឧសភាឆ្នាំ២០២០»។ ទីភ្នាក់ងារបានកត់សម្គាល់ថា មានដីកាស្វែងរកដាច់ដោយឡែកមួយក៏ត្រូវបានចេញនៅឡាសវេហ្គាសដែរ ប៉ុន្តែបាននិយាយថា គ្មានការចាប់ខ្លួនណាមួយត្រូវបានធ្វើឡើងនោះទេ ព្រោះគេមិនបានរកលោក Jake Paul ឃើញទេនៅពេលនោះ។

ការវាយឆ្មក់ទៅលើលំនៅដ្ឋានរបស់លោក Jake Paul នៅកាឡាបាសាស (Calabasas) ត្រូវបានថតជាប់នៅក្នុងរូបថត និងវីដេអូ ដែលផ្សព្វផ្សាយតាមបណ្តាញសង្គម។ មន្ត្រីទាំងនោះត្រូវបានគេឃើញថា មានកាន់កាំភ្លើងវែងជាច្រើនចេញពីផ្ទះលោក Jake Paul ។ តារា YouTube រូបនេះត្រូវបានគេចោទប្រកាន់កាលពីខែមិថុនា ពីបទប្រព្រឹត្តិបទឧក្រិដ្ឋនិងការប្រមូលផ្តុំខុសច្បាប់ បន្ទាប់ពីមានវីដេអូនបង្ហាញថា គាត់មានវត្តមាននៅផ្សារទំនើបមួយនៅ Scottsdale រដ្ឋ Arizona ក្បែរទីក្រុង Phoenix ដែលនៅទីនោះអ្នកតវ៉ារឿងលោក George Floyd មួយចំនួនបានចូលលួច និងបំផ្លិចបំផ្លាញទ្រព្យសម្បត្តិ។ ខណៈពេលដែលប៉ូលីសនៅ Scottsdale បានបំភ្លឺថា ការចោទប្រកាន់ទាំងនោះត្រូវបានគេរំសាយវិញ ប៉ុន្តែការស៊ើបអង្កេតរបស់សហព័ន្ធកំពុងបន្ត។

ប៉ុន្តែយ៉ាងណា YouTuber រូបនេះបានអះអាងថា គាត់មិនបានចូលរួមក្នុងការលួច ឬបំផ្លាញទ្រព្យសម្បត្តិណាមួយទេ ប៉ុន្តែបានទទូចថា គាត់គ្រាន់តែនៅទីនោះដើម្បីចងក្រងឯកសារបាតុកម្មដែលប្រែជាកុបកម្ម ដែលបានកើតឡើងភ្លាមៗបន្ទាប់ពីប៉ូលីសបានសម្លាប់លោក George Floyd នៅ Minneapolis ។ មេធាវីរបស់លោក Paul បានទទួលស្គាល់ការវាយឆ្មក់កាលពីថ្ងៃពុធ ដោយនិយាយថាកូនក្តីរបស់គាត់មានបំណងសហការជាមួយការស៊ើបអង្កេត ហើយថាក្រុមមេធាវីរបស់គាត់នៅតែកំពុងប្រមូលព័ត៌មានអំពីរឿងនេះ៕

អត្ថបទ៖ លីដា
ប្រភព៖ RT