សៀវភៅថ្មីចំណងជើងថា «RAGE» សរសេរដោយអ្នកកាសែតវ៉ាស៊ីនតោនប៉ុស្តិ៍ នឹងមានបង្ហាញពីចំណងជិតស្និទ្ធតាមរយៈសារឆ្លងឆ្លើយ រវាងលោក ដូណាល់ ត្រាំ និងលោក គីម ជុងអ៊ុន

ប្រធានាធិបតីកូរ៉េខាជើងលោក គីម ជុងអ៊ុន បាននិយាយថា ទំនាក់ទំនងរបស់លោកជាមួយលោក ដូណាល់ ត្រាំ គឺដូចជា «ភាពយន្តស្រមើស្រមៃ» នេះបើយោងតាមសម្ដីលោក Bob Woodward ដែលជាអ្នកសរសេរសៀវភៅថ្មីមួយស្តីពីប្រធានាធិបតីអាមេរិក ដែលសៀវភៅនោះក៏គ្រោងនឹងបង្ហាញលិខិតឯកជនចំនួន ២៥ ដែលត្រូវបានផ្លាស់ប្តូររវាងមេដឹកនាំទាំងពីរកន្លងមក។

បើយោងតាមក្រុមហ៊ុន​បោះពុម្ពផ្សាយ ​​Simon & Schuster បាននិយាយថា អ្នកសារព័ត៌មានស៊ើបអង្កេតលោក Bob Woodward បានទទួលសាររវាងមេដឹកនាំទាំងពីរ ដែលមិនធ្លាប់ត្រូវបានបង្ហាញជាសាធារណៈពីមុនមកទេ ហើយគាត់បានបញ្ចូលវាក្នុងសៀវភៅថ្មីមួយរបស់គាត់ ប៉ុន្តែមិនបានបញ្ជាក់ពីរបៀបដែលគាត់ទទួលបានវានោះទេ។

មួយនៅក្នុងចំណោមលិខិតទាំងនោះលោក គីម ជុងអ៊ុន បានពិពណ៌នា អំពីចំណងមិត្តភាពរវាងមេដឹកនាំទាំងពីរ ថាជា «ភាពយន្តស្រមើស្រមៃ» ព្រោះមេដឹកនាំទាំងពីរបានចូលរួមក្នុងការទូតយ៉ាងប្រសើរមិនធ្លាប់មានពីមុនជាមួយគ្នា។ សៀវភៅនោះនឹងមានចំណងជើងថា «Rage» ហើយវា និងសៀវភៅមួយទៀតដែលបន្ដពីសៀវភៅ «Fear» នឹងត្រូវចេញលក់នៅថ្ងៃទី១៥ ខែកញ្ញា ខាងមុខនេះហើយ។

គួរឱ្យដឹងដែរថា លោក ត្រាំ និងលោក គីម បានជួបគ្នាចំនួន ៣ដង ដោយចាប់ផ្តើមពីកិច្ចប្រជុំកំពូលរបស់ខ្លួននៅប្រទេសសិង្ហបុរីក្នុង ខែមិថុនា ឆ្នាំ២០១៨ ប៉ុន្តែមានការរីកចម្រើនតិចតួចលើកិច្ចប្រឹងប្រែង ដើម្បីលុបបំបាត់អាវុធនុយក្លេអ៊ែររបស់កូរ៉េខាងជើង។ ប៉ុន្មានខែបន្ទាប់ពីកិច្ចប្រជុំនៅប្រទេសសិង្ហបុរី លោក ត្រាំ បានថ្លែងទៅកាន់អ្នកគាំទ្ររបស់គាត់ថាពួកគាត់ទាំងពីរនាក់គឺចូលចិត្តគ្នា ហើយតែងតែអួតថា គាត់បានទទួលសារល្អៗពីលោក គីម ​ជុងអ៊ុន ទោះបីការជួបគ្នានៅវៀតណាមក៏ធ្លាប់បញ្ចប់ទាំងពាក់កណ្ដាលទី៕

អត្ថបទ៖ លីដា
ប្រភព៖ បាងកកប៉ុស្ដិ៍