សម្តេចតេជោ ហ៊ុន សែន សុខចិត្តចេញថវិកាផ្ទាល់ខ្លួន 3ម៉ឺនដុល្លារ ដើម្បីបញ្ចប់វិវាទដីធ្លីរាំរ៉ៃរវាងចៅៗ ១៤នាក់និងជីដូនបង្កើត នៅខេត្តកណ្តាល

កាលពីពេលថ្មីៗនេះមានករណីវិវាទដីធ្លីមួយនៅក្នុងខេត្តកណ្តាល ចៅៗនិងជីដូនបង្កើតរបស់កើតជាការប្តឹងផ្តល់គ្នាទៅវិញទៅមក រហូតចុងក្រោយវិវាទមួយនេះត្រូវបានដោះស្រាយរួចជាស្ថាពរ ដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញថវិកាផ្ទាល់ខ្លួនចំនួន៣ម៉ឺនដុល្លារសហរដ្ឋអាមេរិក ដើម្បីបញ្ចប់វិវាទរាំរ៉ៃមួយនេះ។ ដើម្បីរឿងត្រូវបានឯកឧត្តម ដួង តារា រៀបរាប់ថា៖

“អរគុណសម្តេចតេជោ ហ៊ុន សែន និងអរគុណសន្តិភាព! ធ្វើអ្វីក៏ដោយ ត្រូវមានមេត្តាធម៍ និងគុណធម៍ក្នុងខ្លួន ថ្ងៃទី៧ កញ្ញា នេះតាមពិតទៅជាថ្ងៃដែលមនុស្ស១៤នាក់ (មានកុមារតូចៗ៨នាក់ផងដែរ) ត្រូវរស់នៅ អត់ជម្រក ដោយសារចាញ់ក្តីជីដូន និងមីងបង្កើតក្រោមសាលក្រមស្ថាពរតុលាការខេត្តកណ្តាល រវាង លោកយាយ ស៊ុយ ផូ និងចៅ ប៊ូ ស្រីទូច,ប៊ូ ស្រីម៉ៅ, ប៊ូ រ៉ាឌី , ប៊ូ រ៉ាវីដ ។ ករណីនេះត្រូវបានអនុវត្ត២ដងរួចមកហើយ ប៉ុន្តែធ្វើទៅអត់បានដោយសារភាគីចៅៗទាំង៤គ្រួសារគ្មានជម្រករស់នៅ។ ដូច្នេះហើយ នៅថ្ងៃទី ៧ កញ្ញានេះ គឺដីការអនុវត្តន៍ដោយបង្ខំអោយចុះចេញពីដីនិងផ្ទះតែម្តង។

ពិតជាមហាសំណាងខ្លាំងណាស់ ដែលសម្តេចតេជោនាយករដ្ឋមន្រ្តី បានចាត់ខ្ញុំបាទ និងលោកអភិបាលខេត្តកណ្តាលអោយចុះពិនិត្យដោះស្រាយជាបន្ទាន់ក្រៅប្រព័ន្ធតុលាការ។ ក្រោយពីបានដឹងអំពីដើមចមនៃសាច់រឿង គឺលោកយាយ ស៊ុយ ផូ មានការអាក់អន់ស្រពន់ចិត្តនឹងចៅៗដែលមិនស្គាល់ចាស់ទុំ មើលងាយគាត់ជាជីដូន ទើបឈានទៅដល់ការប្តឹងផ្តល់គ្នា ដោយលោកយាយប្តឹងទារយកដីទំហំ (១៣មx ២០ម) ពីចៅៗទាំង៤ ដែលពួកគេបានរស់នៅអាស្រ័យផលជាង២០ឆ្នាំមកហើយ (មានលិខិតប្រគល់សិទ្ធិអោយកាន់កាប់ជាកម្មសិទ្ធិផងដែរ)។ ប៉ុន្តែក្រោយពីចៅៗទាំង៤ បានសុំខមាទោសពីលោកយាយ ស៊ុយ ផូ ហើយ គឺលោកយាយបានអត់ឱនអោយពួកគេ ដោយអោយចៅៗទាំង៤នាក់ (រួមទាំងចៅទួតសរុបទាំងអស់ ១៥ នាក់) បានបន្តរស់នៅស្របច្បាប់ក្នុងផ្ទះលើដីនេះ ដោយលោកយាយយល់ព្រមទទួលថវិកា $30,000 ដើម្បីបញ្ចប់វិវាទទាំងស្រុង។

ប៉ុន្តែដោយសារគ្រួសារទាំង៤ ក្រីក្រខ្លាំង គ្មានលទ្ធភាពសូម្បីតែបន្តិច ទើបសម្តេចតេជោនាយករដ្ឋមន្រ្តី បានបរិច្ចាគថវិកាចំនួនខាងលើជូនទៅលោកយាយ ស៊ុយ ផូ ដើម្បីបញ្ចប់រឿងទាំងស្រុង កាលពីម្សិលមិញថ្ងៃទី ៦ ខែ កញ្ញា នៅក្រោមការសម្របសម្រួលដែលមានរូបខ្ញុំ និង លោកអភិបាលខេត្តកណ្តាល គង់ សោភ័ណ ចូលរួមជាមួយអាជ្ញាធរខេត្តជាច្រើនរូប។ ចៅៗទាំង៤គ្រួសារមានសេចក្តីរំភើបរីករាយក្រៃលែងចំពោះការយកចិត្តទុកដាក់ដ៏ខ្ពង់ខ្ពស់បំផុតរបស់សម្តេចតេជោ ជាមួយនឹងដំណោះស្រាយឈ្នះឈ្នះដែលបានផ្តល់ក្តីសង្ឃឹមក្នុងជីវិតពួកគេឡើងវិញ។

គ្រួសារទាំងមូលបានគោរពអរគុណសម្តេចទាំងទ្វេយ៉ាងជ្រាលជ្រៅបំផុតចំពោះទឹកចិត្តអាណិតស្រឡាញ់ និងព្រហ្មវិហាធម៍មិនអាចកាត់ថ្លៃបាន ដែលសម្តេចបានលះបង់ជួយជីវិតពួកគេអោយបានរស់ឡើងវិញ។ ខ្ញុំបាទសូមគោរពជូនពរសម្តេចទាំងទ្វេមានសុខភាពល្អអាយុយឺនយូរបំផុតដើម្បីជាម្លប់ដ៏កក់ក្តៅ និងជាទីកន្លែងដែលផ្តល់យុត្តិធម៍ដល់ពលរដ្ឋដើម្បីបានរស់នៅសុខសប្បាយក្រោមម្លប់សន្តិភាព។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និង សូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង៕”