ស្ថានទូតកម្ពុជានៅវៀតណាម អំពាវនាវដល់ប្រជាពលរដ្ឋខ្មែរនៅវៀតណាម អនុវត្តវិធានការការពារសុវត្ថិភាពរបស់ក្រសួងសុខាភិបាល ក្រោយរកឃើញនូវបណ្តុំ នៃការឆ្លងជំងឺកូវីដ-១៩ ក្នុងសហគមន៍ជាច្រើនករណី
រាជធានីភ្នំពេញ៖ តាមការចុះផ្សាយរបស់ ក្រសួងព័ត៌មាន បានឲ្យដឹងថា នាថ្ងៃទី២៩ ខែមករា ឆ្នាំ២០២១នេះ ស្ថានទូតកម្ពុជាប្រចាំសាធារណរដ្ឋសង្គមនិយមវៀតណាម បានជូនដំណឹងដល់ និស្សិត សិក្ខាកាមនគរបាល-យោធា និងប្រជាពលរដ្ឋខ្មែរដែលកំពុងសិក្សាស្នាក់នៅ ឬកំពុងមានវត្តមានក្នុងប្រទេសវៀតណាម ត្រូវអនុវត្តវិធានការការពារសុវត្ថិភាព និងការណែនាំរបស់ក្រសួងសុខាភិបាលឲ្យបានខ្ជាប់ខ្ជួន បន្ទាប់ពីប្រទេសវៀតណាម បានរកឃើញនូវបណ្តុំ នៃការឆ្លងជំងឺកូវីដ-១៩ ក្នុងសហគមន៍ ចំនួន ៨៤ករណី នៅខេត្ត Hai Duong និងខេត្ត Quang Ninh ។
ក្នុងសេចក្តីជូនដំណឹងរបស់ស្ថានទូត បានបញ្ជាក់ថា តាមសារព័ត៌មានវៀតណាម (Viet Nam News) ចុះផ្សាយថ្ងៃទី ២៩ ខែមករាឆ្នាំ ២០២១ បានឱ្យដឹងថា បន្ទាប់ពីបានរកឃើញនូវបណ្តុំនៃការឆ្លងជំងឺកូវីដ-១៩ ក្នុងសហគមន៍ចំនួន ៨៤ ករណីនៅខេត្ត Hai Duong និងខេត្ត Quang Ninh នាយករដ្ឋមន្ត្រីវៀតណាមបានបញ្ជាឱ្យបិទក្រុង Chi Linh និងអាកាសយានដ្ឋាន VânĐôn រយៈពេល ២១ ថ្ងៃ។ ករណីឆ្លងជាច្រើនត្រូវបានរកឃើញនៅក្នុងខេត្តHài Duong ។
ជាមួយគ្នានោះប្រជាជនក្នុងស្រុកត្រូវបានស្នើឱ្យស្នាក់នៅក្នុងផ្ទះ ប៉ុន្តែអាចចេញពីផ្ទះសម្រាប់តម្រូវការចាំបាច់ដូចជាទិញអាហារ ថ្នាំសង្កូវ ឬករណីសង្គ្រោះបន្ទាន់ ព្រមទាំងទៅធ្វើការងារ នៅតាមភ្នាក់ងាររោងចក្រសហគ្រាសនិងសេវាកម្ម ដែលចាំបាច់ និងដែលមិនត្រូវបានបិទ។
ដោយឡែកនៅតាមទីសាធារណៈការជួបជុំមនុស្សលើសពីពីរនាក់ ត្រូវបានហាមឃាត់និងត្រូវរក្សាចម្ងាយ ២ ម៉ែត្រពីគ្នា។ សាលារៀនកន្លែងកម្សាន្ត និងអាជីវកម្មមិនចាំបាច់ទាំងអស់ត្រូវបានបិទទ្វារ។ សេវាដឹកជញ្ជូនសាធារណៈ ចេញពីទីក្រុង Chi Linh ត្រូវបានផ្អាក លើកលែងតែករណីផ្លូវការឬតម្រូវការបន្ទាន់។ ប្រជាជនត្រូវបានស្នើឱ្យពាក់ម៉ាស រក្សាគម្លាត និងជៀសវាងការជួបជុំគ្នា។ ខេត្តទាំងនោះក៏បានរៀបចំរបាំង និងប៉ុស្តិ៍ត្រួតពិនិត្យដើម្បីគ្រប់គ្រងការចូលនិងចេញពីខេត្ត។ តំបន់ជាច្រើននៅក្នុងប្រទេសដូចជាទីក្រុងហូជីមិញ ដាណាង ខេត្តBác Giang និងNghè An ក៏បានស្នើមិនឱ្យមានការជួបជុំមនុស្សច្រើនកាត់បន្ថយពិធីបុណ្យនានា និងអនុវត្តវិធានការសុវត្ថិភាព។
ទាក់ទិននឹងការរកឃើញនូវបណ្តុំ នៃការឆ្លងជំងឺកូវីដ-១៩ ស្ថានទូតកម្ពុជាប្រចាំសាធារណរដ្ឋសង្គមនិយមវៀតណាម បានអំពាវនាវដល់និស្សិត សិក្ខាកាមនគរបាល-យោធានិងបងប្អូនប្រជាពលរដ្ឋខ្មែរ កំពុងមានវត្តមានក្នុងប្រទេសវៀតណាម អនុវត្តវិធានការការពារសុវត្ថិភាពការពាក់ម៉ាស លាងដៃ ការរក្សាអនាម័យ និងបន្តអនុវត្តតាមការណែនាំរបស់ក្រសួងសុខាភិបាលឱ្យបានខ្ជាប់ខ្លួន ដើម្បីការពារកុំឱ្យឆ្លងជំងឺកូវីដ -១៩ ជាយថាហេតុ។ ស្ថានទូតបានបញ្ជាក់ថា ក្នុងករណីបន្ទាន់សូមទំនាក់ទំនងផ្នែកកិច្ចការកុងស៊ុលរបស់ស្ថានទូត (+៨៤ ៣៩៤២៤៧៨៨)៕
ប្រភព៖ ក្រសួងព័ត៌មាន