ក្រុមហ៊ុនសំណង់អវកាសខ្នាតធំ Orbital Assembly Corporation (OAC) បានប្រកាសថា ខ្លួនគ្រោងនឹងសាងសង់សណ្ឋាគារ Voyager Class យ៉ាងប្រណីតមួយនៅលើទីអវកាស ដែលអាចទទួលភ្ញៀវបានរហូតដល់ទៅ  ៤០០ នាក់។ សណ្ឋាគារ Voyager Class មួយនោះ នឹងមិនត្រឹមតែមានបន្ទប់សម្រាប់លំហែកាយតែមួយមុខនោះទេ វានឹងមានមកជាមួយបារ៍ រោងកុន ភោជនីយដ្ឋាន និងកន្លែងស្ប៉ាជាដើម។ ក្រុមហ៊ុននិយាយថា គម្រោងនេះនឹងចាប់ផ្ដើមសាងសង់នៅឆ្នាំ២០២៥ ហើយរំពឹងនឹងអាចដំណើរការនៅឆ្នាំ២០២៧។

ក្រុមហ៊ុន OAC គឺជាអ្នកចំណូលថ្មីដែលទើបតែបង្កើតឡើងនៅឆ្នាំ២០១៩ នេះប៉ុណ្ណោះ ហើយពួកគេមានគោលបំណងផ្ដោតសំខាន់លើការកម្សាន្តនៅស្ថានីយអវកាស (Voyager Station)។ បើតាមវេបសាយរបស់ក្រុមហ៊ុនបាននិយាយថា ពួកគេនឹងបំពាក់ប្រព័ន្ធដែលអាចបង្កើតបានជាទំនាញសិប្បនិម្មិត សម្រាប់ទីតាំងទាំងនោះក្នុងកម្រិតផ្សេងៗពីគ្នា។ ស្ថានីយអវកាសរបស់ OAC បង្កើតឡើងដើម្បីបម្រើទាំងភ្នាក់ងារអវកាស ឬអ្នកទេសចរអវកាស ដែលចង់សាកល្បងនូវបទពិសោធន៍ថ្មីៗ។

ផ្នែកមួយចំនួនរបស់សណ្ឋាគារនឹងលក់ទៅឱ្យអង្គការ NASA សម្រាប់ការស្រាវជ្រាវ ខណៈផ្នែកមួយចំនួនធំ គឺទុកជាកន្លែងកម្សាន្ដ ភោជនីយដ្ឋាន ឬបារ៍សម្រាប់ភ្ញៀវ។ យោងតាមគេហទំព័រ Space.com ឫសគល់នៃគម្រោងនេះគឺបានដំណើរការអស់រយៈពេលជាច្រើនឆ្នាំមកហើយ បន្ទាប់ពីលោក John Blincow បានបង្កើតមូលនិធិ The Gateway នៅឆ្នាំ២០១២ ដែលមូលនិធិនេះគឺជាស្ថាបនិករបស់ OAC ៕

អត្ថបទ៖ លីដា
ប្រភព៖ Unilad