យោងតាមការចុះផ្សាយរបស់សារព័ត៌មាន BBC បាននិយាយថា ទីក្រុង Minneapolis នៅថ្ងៃសុក្រនេះ បានយល់ព្រមចំណាយប្រាក់ ២៧លានដុល្លារ ដើម្បីដោះស្រាយបណ្តឹងរដ្ឋប្បវេណីពីក្រុមគ្រួសាររបស់លោក George Floyd ជុំវិញការស្លាប់របស់លោកកាលពីឆ្នាំមុន ខណៈក្រុមប្រឹក្សាតុលាការនៅតែបន្តសុំណំរឿងឃាតកម្មមួយនេះ។ គួររំលឹកជូនផងដែរថា លោក George Floyd ត្រូវបានប៉ូលីសស្បែកស Derek Chauvin សង្កត់ករយៈពេលជាង ៨នាទី រហូតដល់ស្លាប់កាលពីខែឧសភា ឆ្នាំ២០២០ ជុំវិញរឿងក្រដាសប្រាក់ ២០ ដុល្លារក្លែងក្លាយ។ មរណភាពរបស់គាត់បានធ្វើឱ្យមានកំហឹងជាសារធារណៈ និងមានការតវ៉ាទ្រង់ទ្រាយធំនៅទូទាំងសហរដ្ឋអាមេរិក។

នៅក្នុងសេចក្តីថ្លែងការណ៍មួយដែលត្រូវបានរៀបចំឡើងលោក Ben Crump ដែលជាមេធាវីរបស់គ្រួសារលោក George Floyd បាននិយាយថា វាជាការដោះស្រាយសិទ្ធិស៊ីវិលដ៏ធំបំផុតមិនធ្លាប់មាន ហើយបានផ្ញើសារដ៏មានឥទ្ធិពលមួយថា «ជីវិតជនជាតិស្បែកខ្មៅក៏មានតម្លៃ ហើយភាពសាហាវឃោរឃៅរបស់ប៉ូលីសប្រឆាំងនឹងសម្បុរត្រូវតែបញ្ចប់»។ ការទូទាត់នេះរួមបញ្ចូលទាំងទឹកប្រាក់ចំនួន ៥០ ម៉ឺនដុល្លារ សម្រាប់សង្កាត់ Minneapolis ភាគខាងត្បូង ដែលរាប់បញ្ចូលទាំងតំបន់ផ្លូវប្រសព្វ 38th & Chicago ដែលត្រូវដាក់រនាំងចាប់តាំងពីលោក George Floyd បានទទួលមរណភាព ដោយមានរូបចម្លាក់ដែក និងផ្ទាំងគំនូរដ៏ធំជាការរំលឹកដល់វិញ្ញាណក្ខន្ធរបស់គាត់៕

អត្ថបទ៖ លីដា
ប្រភព៖ BBC