នាវាមុជទឹកមួយគ្រឿងរបស់កងទ័ពជើងទឹកឥណ្ឌូនេស៊ី មានមនុស្សទាំងអស់ ៥៣នាក់ បានបាត់ខ្លួននៅភាគខាងជើងកោះបាលី

យោងតាមការចុះផ្សាយរបស់សារព័ត៌មាន CNN នៅថ្ងៃពុធ ទី២១ ខែមេសា ឆ្នាំ២០២១ បានរាយការណ៍ថា នាវាមុជទឹករបស់កងទ័ពជើងទឹកឥណ្ឌូនេស៊ីមួយគ្រឿង បានបាត់ខ្លួននៅក្នុងដែនទឹកភាគខាងជើងកោះបាលី ខណៈដែលនៅលើនាវានោះផ្ទាល់មានអ្នកដំណើរទាំងអស់ ៥៣នាក់ ដោយរួមមានទាំងមេបញ្ជាការ និងកងនាវិក។ អ្នកនាំពាក្យបាននិយាយថា នាវាមុជទឹកនោះជាប្រភេទនាវាមុជទឹក KRI Nanggala-402 ផលិតនៅប្រទេសអាល្លឺម៉ង ហើយវាបានដាច់ទំនាក់ទំនងនៅក្នុងដែនទឹកប្រហែល ៩៥ គីឡូម៉ែត្រ ខាងជើងកោះបាលីកាលពីព្រឹកថ្ងៃពុធ (ម៉ោងក្នុងស្រុក) ។

យោងតាមគេហទំព័ររបស់កងកម្លាំងប្រដាប់អាវុធជាតិឥណ្ឌូនេស៊ីបាននិយាយថា នាវាមុជទឹកនេះគឺបាននិងកំពុងរៀបចំខ្លួនសម្រាប់សមយុទ្ធមីស៊ីលមួយនៅថ្ងៃព្រហស្បតិ៍នេះ ហើយវាអាចប្រតិបត្តិការនៅជម្រៅ ៥០០ម៉ែត្រ ពីផ្ទៃទឹកខាងលើ ប៉ុន្តែមានការព្រួយបារម្ភថា នាវាអាចនឹងមុជឬលិចជ្រៅជាងនេះ ២០០ ម៉ែត្របន្ថែមទៀត។ ឥឡូវនេះកងទ័ពជើងទឹក និងទីភ្នាក់ងារស្វែងរកនិងជួយសង្គ្រោះជាតិ បានបញ្ជូននាវាមុជទឹកចំនួន ៥ គ្រឿង និងនាវាផ្សេងៗទៀត ដើម្បីបន្តការស្រាវជ្រាវនាវាមុជទឹកដែលបានបាត់នេះ ហើយប្រទេសឥណ្ឌូនេស៊ីក៏បានស្នើសុំជំនួយពីកងទ័ពជើងទឹកអូស្ត្រាលី សិង្ហបុរី និងឥណ្ឌាផងដែរ៕

អត្ថបទ៖ លីដា
ប្រភព៖ CNN