រដ្ឋបាលខេត្តព្រៃវែង សម្រេចផ្អាកបណ្ដោះអាសន្ននៅផ្សារក្រុងព្រៃវែង ក្នុងសង្កាត់កំពង់លាវ រយៈពេល ១៤ថ្ងៃ

ខេត្តព្រៃវែង៖ យោងតាមសេចក្តីជូនដំណឹងរបស់ រដ្ឋបាលខេត្តព្រៃវែង នៅថ្ងៃទី២៨ ខែកញ្ញា ឆ្នាំ២០២១ ស្តីពីការផ្អាកបណ្តោះអាសន្ន ផ្សារក្រុងព្រៃវែង ស្ថិតក្នុងភូមិលេខ៣ សង្កាត់កំពង់លាវ ក្រុងព្រៃវែង ខេត្តព្រៃវែង ដោយរដ្ឋបាលខេត្ត សូមជម្រាបជូនដល់បងប្អូនប្រជាពលរដ្ឋ និងបងប្អូនអាជីវករក្នុងផ្សារក្រុងព្រៃវែងទាំងអស់មេត្តាជ្រាបថា កាលពេលថ្មីៗនេះ មានអាជីវករលក់ដូរក្នុងផ្សារក្រុងព្រៃវែងរកឃើញវិជ្ជមានកូវីដ-១៩ ក្រោយពីមានអាការៈសង្ស័យ និងយកសំណាកធ្វើតេស្តរហ័ស(Rapid Test)។ បច្ចុប្បន្ន អាជ្ញាធរក្រុង និងសង្កាត់កំពុងបន្តស្រាវជ្រាវ និងស្វែងរកអ្នកប៉ះពាល់ដោយផ្ទាល់ និងប្រយោលបន្ថែមទៀត ដើម្បីយកសំណាកមកធ្វើតេស្តរកមេរោគកូវីដ-១៩។

ដើម្បីបង្ការ ទប់ស្កាត់ និងកាត់ផ្ដាច់នូវការចម្លងនៃជំងកូវីដ-១៩ ពីសហគមន៍មួយទៅសហគមន៍មួយ ក៏ដូចជា ដើម្បីការពារអាយុជីវិតបងប្អូនប្រជាពលរដ្ឋ សុខភាពសាធារណៈ និងសណ្ដាប់ធ្នាប់សង្គម រដ្ឋបាលខេត្តព្រៃវែង សូមធ្វើការ ផ្អាកបណ្ដោះអាសន្នផ្សារក្រុងព្រៃវែង(ទាំងក្នុង និងក្រៅបរិវេណផ្សារ) ស្ថិតក្នុងភូមិលេខ៣ សង្កាត់កំពង់លាវ ក្រុងព្រៃវែង រយៈពេល១៤ថ្ងៃ ចាប់ពីថ្ងៃទី២៩ ខែកញ្ញា ឆ្នាំ២០២១ រហូតដល់ថ្ងៃទី១២ ខែតុលា ឆ្នាំ២០២១។

រដ្ឋបាលខេត្តព្រៃវែង សូមអំពា​វនាវដល់ បងប្អូនប្រជាពលរដ្ឋ ពិសេសអាជីវករក្នុងផ្សារក្រុងព្រៃវែងទាំងអស់ ដែលធ្លាប់បានប្រាស្រ័យទាក់ទងទាំងផ្ទាល់ និងប្រយោលជាមួយអ្នកវិជ្ជមានកូវីដ-១៩ ត្រូវរាយការណ៍ជូនអាជ្ញាធរជាបន្ទាន់ និងសូមប្រញាប់រួសរាន់ទៅផ្ដល់វត្ថុសំណាក ដើម្បីរកមេរោគកូវីដ-១៩ នៅតាមមន្ទីរពេទ្យបង្អែក និងត្រូវធ្វើវចត្តាឡីស័កនៅតាមផ្ទះរបស់ខ្លួនឲ្យបានត្រឹមត្រូវ និងម៉ឺងម៉ាត់បំផុត ជាពិសេសអនុវត្តឲ្យបានខ្ជាប់ខ្ជួននូវវិធានការ “៣កុំ និង៣ការពារ ” ៕

ប្រភព៖ រដ្ឋបាលខេត្តព្រៃវែង