[ទំព័រម្ហូប] ត្រីតុកកែអប់ក្រូចឆ្មាពិសេស​ មុខម្ហូបដ៏ល្បីមួយនៅតាមហាងធំៗ និងនៅក្នុងពិធីមង្គលការ ម៉ោះសាករៀនធ្វើញ៉ាំទាំងអស់គ្នា

សួស្តីបងប្អូនទាំងអស់គ្នា ថ្ងៃនេះដែរយើងមានរូបមន្ត ត្រីតុកកែអប់ក្រូចឆ្មា​ពិសេសមកចែកជូន​ធានារសជាតិឆ្ងាញ់មិនចាញ់ហាងល្បីឡើយ តោះយើងមកមើលគ្រឿងផ្សំនិងវិធីធ្វើទាំងអស់គ្នា​៖

*គ្រឿងផ្សំ

1. ត្រីតុកកែ ១ក្បាល
2. គល់ស្លឹកគ្រៃ ៤កំណាត់
3. ខ្ទឹមសចិញ្ច្រាំ ៣ស្លាបព្រាបាយ
4. ម្ទេសខ្មាំងចិញ្ច្រាំ ៣ស្លាបព្រាបាយ
5. ឬសជីវ៉ាន់ស៊ុយចិញ្ច្រាំ ១ស្លាបព្រាបាយ
6. ទឹកស៊ុប រឺទឹកធម្មតា 1/4ចានចង្កឹះ
7. ទឹកត្រី២ស្លាបព្រាបាយ
8. ស្ករស ២ស្លាបព្រាកាហ្វេ
9. អំបិល ១ស្លាបព្រាកាហ្វេ
10. ទឹកក្រូចឆ្មា ៤ស្លាបព្រាបាយ
11. ខ្ទឹមសហាន់បន្ទះសម្រាប់លំអរ
12. ក្រូចឆ្មាហាន់បន្ទះ សម្រាប់លំអរ
13. ម្ទេសស្រស់ ក្រហមសម្រាប់លំអរ
14. ជីវ៉ាន់ស៊ុយ សម្រាប់លំអរ

*វិធីធ្វើ

• យកត្រីតុកកែមកធ្វើអោយស្អាត ស្រកាលាងទឹកអោយស្អាត រួចអង្កន់ត្រី ៣ទៅ៤ឆូត រួចយកគល់ស្លឹកគ្រៃ ញាត់ចូលទៅក្នុងមាត់ត្រីតុកកែ រួចយកទៅចំហុយរយះពេល ១០ទៅ១៥នាទី
• តោះយើងងាកមកធ្វើទឹកក្រូចឆ្មាសម្រាប់ស្រោយពីលើដោយយើងយកចានមកដាក់ទឹកស៊ុប ទឹកត្រី ស្ករស ទឹកក្រូចឆ្មា និងអំបិលកូរអោយស្កររលាយ តាមដោយខ្ទឹមសចិញ្ច្រាំ ឬសជីវ៉ាន់ស៊ុយ ម្ទេសខ្មាំងចិញ្ច្រាំ កូរអោយចូលគ្នា រួចស្រោយពីលើត្រីតុកកែដែលយើងចំហុយរួចយកទៅចំហុយម្តងទៀតរយះពេល៥នាទី រួចស្រង់ឡើងមករោយពីលើដោយ ជីវ៉ាន់ស៊ុយ ម្ទេស ខ្ទឹមស ក្រូចឆ្មា ជាការស្រេច។