លោក ម៉ៅ ធនិន ឡើងធ្វើអភិបាលខេត្តកំពតភ្លាមចាប់ផ្តើមវេទិកាសាធារណៈលើកទី១ ដោះស្រាយជម្លោះដីធ្លី រវាងក្រុមហ៊ុន សេង សម្បត្តិ និងពលរដ្ឋនៅស្រុកដងទង់ កក្រើកមហាជនកាលពីព្រឹកមិញ

នាថ្ងៃទី២៤ ខែតុលា ឆ្នាំ២០២១នេះ ក្រុមប្រឹក្សាខេត្តកំពតបានបើកវេទិកាសាធារណៈ សំដៅឈានទៅបញ្ចប់ជម្លោះដីធ្លី រកភាពស្របច្បាប់ រវាងក្រុមហ៊ុន សេង សម្បត្តិ ម្ចាស់គម្រោងដីឡូបុរីដងទង់ និងប្រជាពលរដ្ឋរស់នៅក្នុងមូលដ្ឋាននេះ ប្រមាណ៤គ្រួសារ មានទីតាំងដីនៅភូមិសុភី ឃុំស្រែជាខាងជើង ស្រុកដងទង់ ខេត្តកំពត នៅសាលាស្រុកដងទង់។

នៅក្នុងវេទិកាសាធារណៈ លោក ម៉ៅ ធនិន ក្រោយពីបានជជីកសួរ និងស្តាប់ភាគីជម្លោះទាំងសងខាង លើកឡើងយ៉ាងក្បោះក្បាយរួចមក ក៏សម្រេចទទួលស្គាល់ថា ខាងម្ចាស់គម្រោងបុរីបានទិញសិទ្ធិអាស្រ័យផលជាក់ស្តែង បន្តពីពលរដ្ឋ១៩គ្រួសារ ស្មើនឹង៣០នាក់ ប៉ុន្តែការសាងសង់ជាបុរី តម្រូវឲ្យខាងក្រុមហ៊ុន សេង សម្បត្តិ ខាងលើ គិតគូរសម្រួលទៅតាមផ្លូវច្បាប់ ចំពោះគូរជម្លោះជាប្រជាពលរដ្ឋ ៤គ្រួសារ។ ទន្ទឹមនឹងនោះ លោក ម៉ៅ ធនិន បានសម្រេចយកគោលការណ៍ដោះស្រាយ ២ចំនុច គឺតាមគោលការណ៍ច្បាប់ និងតាមលក្ខខ័ណ្ឌនៃក្រុមគ្រួសារតែមួយ។ គោលការណ៍គ្រួសារតែមួយ គឺជាមនុស្សដែលរស់នៅក្នុងខេត្តដូចគ្នា ចំណែកឯ គោលការណ៍ច្បាប់ គឺលោកអភិបាលខេត្ត បានសម្រេចទទួលស្គាល់ខាងភាគីគម្រោងបុរីថា បានទិញសិទ្ធិអាស្រ័យផលបន្តពីប្រជាពលរដ្ឋ ១៩គ្រួសារ តែគម្រោងសាងសង់ជាបុរីនោះ លោកអភិបាលខេត្ត មិនទាន់សម្រេចឲ្យទេ រង់ចាំសិក្សាផ្លូវច្បាប់ និងការធ្វើវេទិការពិគ្រោះយោបល់ជាមួយពលរដ្ឋសិន ព្រោះការអភិវឌ្ឍ គឺដើម្បីប្រជាពលរដ្ឋ មិនមែនដើម្បីបុគ្គលម្នាក់ ពីរនាក់នោះទេ។ គួរបញ្ជាក់ផងដែរថា កាលពីព្រឹកមិញនេះ វេទិកាសាធារណៈរបស់លោក ម៉ៅ ធនិន បានធ្វើអោយកក្រើកមហាជន តាមដានស្ទើរទូទាំងប្រទេស នៅពេញបណ្តាញសង្គម Facebook៕