បុរសជនជាតិឥណ្ឌាម្នាក់បានចំណាយប្រាក់ ២៦០,០០០ ដុល្លារអាមេរិក ដើម្បីសាងសង់ផ្ទះឱ្យដូចនឹងវិមាន Taj Mahal សម្រាប់ជាអំណោយដល់ភរិយា
យោងតាមការចុះផ្សាយរបស់សារព័ត៌មាន BBC បានរាយការណ៍ថា បុរសជនជាតិឥណ្ឌាម្នាក់បានសាងសង់ផ្ទះ យកគំរូតាមវិមាន Taj Mahal ដែលជាវិមានចេតិយដ៏ល្បីល្បាញបំផុតរបស់ពិភពលោក។ បុរសម្នាក់នោះមានឈ្មោះថា Anand Prakash Chouksey មានអាយុ ៥២ឆ្នាំ គឺជាអ្នកជំនួញមានស្ដុកស្ដម្ភម្នាក់ បានសាងសង់ «វិមាននៃសេចក្តីស្រឡាញ់» របស់គាត់នៅក្នុងទីក្រុង Burhanpur ក្នុងរដ្ឋ Madhya Pradesh ដើម្បីជាអំណោយសម្រាប់ភរិយា ប៉ុន្តែក៏សម្រាប់ទីក្រុង និងប្រជាជនទាំងអស់ផងដែរ។ ផ្ទះនេះបានចំណាយប្រាក់ប្រហែល ២០ លានរូពី (២៦០,០០០ ដុល្លារអាមេរិក) ដើម្បីសាងសង់ឡើង។
ជម្រាបដែរថា Taj Mahal គឺជាកន្លែងគោរពបូជា ដែលបានសាងសង់នៅសតវត្សរ៍ទី១៧ ក្នុងទីក្រុង Agra របស់ប្រទេសឥណ្ឌា។ វាត្រូវបានសាងសង់ឡើងដោយអធិរាជ Mughal Shah Jahan ក្នុងការចងចាំដល់ម្ចាស់ក្សត្រី Mumtaz ដែលទ្រង់បានសោយទិវង្គតនៅពេលផ្តល់កំណើតដល់បុត្រទី១៤ របស់ពួកគេ។ Taj Mahal គឺជាវិមានថ្មម៉ាបដ៏គួរឱ្យចាប់ភ្ញាក់ផ្អើល និងល្បីល្បាញលើការងារបន្ទះឈើដ៏ស្មុគស្មាញរបស់វា ហើយក៏ជាកន្លែងទាក់ទាញទេសចរណ៍ដ៏ធំបំផុតមួយរបស់ប្រទេសឥណ្ឌា។ មុនពេលជំងឺរាតត្បាត COVID-19 បានរំខានដល់ប្រទេសឥណ្ឌា វិមាននេះបានទាក់ទាញមនុស្សរហូតដល់ ៧០,០០០ នាក់ ជារៀងរាល់ថ្ងៃ។
ផ្ទះចម្លងរបស់លោក Chouksey បាននិងកំពុងទាក់ទាញអ្នកទស្សនាជាបន្តបន្ទាប់ ដោយមានមនុស្សមកទស្សនា ហើយថតយករូបភាពផ្ទះរបស់គាត់។ លោក Chouksey បានបន្ថែមថា៖ «មនុស្សជាច្រើនក៏បានចាប់ផ្តើមថត Pre-Wedding នៅទីនេះដែរ។ ខ្ញុំមិនបញ្ឈប់ពួកគេទេ ព្រោះនៅទីក្រុងយើង ជាសហគមន៍ជិតស្និទ្ធដែលអ្នករាល់គ្នាស្គាល់។ ដូច្នេះផ្ទះខ្ញុំបើកសម្រាប់ទាំងអស់គ្នា»។ លោកបានបញ្ជាក់ថា បើទោះបីជាលោកមិនហាមឃាត់ការចូលមើលរបស់ពលរដ្ឋក៏ដោយ ប៉ុន្តែមិនមែនមនុស្សរាល់គ្នាសុទ្ធតែអាចចូលដោយសេរីទេ ព្រោះថាវាគឺជាផ្ទះដែលពួកគេរស់នៅ។
លោក Chouksey មិនមែនជាមនុស្សទីមួយដែលចម្លងស្នាដៃពីវិមាន Taj Mahal នោះទេ ដោយជាក់ស្ដែងក្នុងឆ្នាំ២០១៣ មានមន្ត្រីរដ្ឋាភិបាលចូលនិវត្តន៍ម្នាក់នៅរដ្ឋ Uttar Pradesh ក៏បានសាងសង់រូបចម្លងនៃ Taj Mahal ជាការចងចាំដល់ភរិយារបស់គាត់ផងដែរ។ ប៉ុន្តែលោក Chouksey និយាយថា ផ្ទះរបស់លោកមិនមែនឧទ្ទិសជូនភរិយាលោកតែម្នាក់នោះទេ។ លោកបានថ្លែងថា៖ «សព្វថ្ងៃនេះមានការស្អប់ច្រើននៅក្នុងប្រទេស មនុស្សបានបែងចែកគ្នាក្នុងតាមរយៈសាសនា និងវណ្ណៈ។ លោកថា៖«ផ្ទះនេះសម្រាប់ខ្ញុំគឺជានិមិត្តរូបនៃសេចក្តីស្រឡាញ់ ដែលជាផ្ទះដែលហួសពីភាពខុសគ្នាក្នុងសង្គមរបស់យើង និងសំឡេងនយោបាយ»៕
វិមាន Taj Mahal ពិតប្រាកដ
អត្ថបទ៖ លីដា
ប្រភព៖ BBC