ប្រទេសជប៉ុនបានប្រកាសនៅថ្ងៃច័ន្ទថា ខ្លួននឹងផ្អាកមិនឲ្យភ្ញៀវបរទេសទាំងអស់ ដែលមកពីជុំវិញពិភពលោកចូលប្រទេសខ្លួន ដោយសារការរីករាលដាលនៃមេរោគកូវីដ១៩ បំប្លែងថ្មី Omicron ដែលជំរុញឱ្យប្រទេសកាន់តែច្រើនត្រូវតែរឹតបន្តឹងច្រកព្រំដែនរបស់ពួកគេ។ នាយករដ្ឋមន្ត្រីលោក Fumio Kishida បាននិយាយថា៖«យើងកំពុងបោះជំហានជាការប្រុងប្រយ័ត្នជាបន្ទាន់ ដើម្បីការពារសេណារីយ៉ូអាក្រក់ណាមួយ ដែលអាចកើតមាននៅក្នុងប្រទេសជប៉ុន» ហើយវិធានការ​នេះ​នឹង​ចូល​ជា​ធរមាន​នៅ​ថ្ងៃ​អង្គារស្អែកនេះ។

ការសម្រេចចិត្តនេះមានន័យថា ប្រទេសជប៉ុននឹងស្តារការគ្រប់គ្រងព្រំដែន ដែលខ្លួនបានបន្ធូរបន្ថយនៅដើមខែនេះ សម្រាប់ភ្ញៀវធុរកិច្ចរយៈពេលខ្លី និស្សិត និងកម្មករបរទេស។ លោក Kishida បានជំរុញមនុស្សឱ្យបន្តពាក់ម៉ាស់ និងវិធានការប្រឆាំងមេរោគជាមូលដ្ឋានផ្សេងទៀត រហូតដល់ព័ត៌មានលម្អិតបន្ថែមនៃវ៉ារ្យ៉ង់ Omicron ថ្មីត្រូវបានគេស្គាល់។ ប្រទេសជាច្រើនបានផ្លាស់ប្តូរដើម្បីរឹតបន្តឹងព្រំដែនរបស់ពួកគេ ទោះបីជាអ្នកវិទ្យាសាស្ត្របាននិយាយថា វាមិនច្បាស់ថាតើវ៉ារ្យ៉ង់ថ្មីនេះ គួរឱ្យព្រួយបារម្ភជាងការបំប្លែងផ្សេងទៀត ឬអត់៕

អត្ថបទ៖ លីដា
ប្រភព៖ washingtonpost