ចំនួនអ្នកបាត់បង់ជីវិតនៅក្នុងហេតុការផ្ទុះភ្នំភ្លើង នៅឯប្រទេសឥណ្ឌូណេស៊ីកាលពីម្សិលមិញ បានកើនឡើងដល់ ២២នាក់ និង ២២នាក់ ផ្សេងទៀត កំពុងបាត់ខ្លួននៅឡើយ
អាជ្ញាធរឥណ្ឌូណេស៊ីបាននិយាយថា យ៉ាងហោចណាស់មនុស្សចំនួន ២២នាក់ ត្រូវបានបញ្ជាក់ថាបានស្លាប់ នៅក្នុងហេតុការផ្ទុះភ្នំភ្លើងមួយ នៅលើកោះចាវ៉ា ប្រទេសឥណ្ឌូណេស៊ី។ ភ្នំភ្លើងមួយនោះមានឈ្មោះថា Semeru មានកម្ពស់ ៣,៦០០ ម៉ែត្រ ស្ថិតក្នុងខេត្តចាវ៉ាខាងកើត បានផ្ទុះឡើងកាលពីថ្ងៃសៅរ៍ ដែលធ្វើឱ្យមានការសាយភាយផេះ និងកម្អែភ្នំភ្លើង ចូលទៅក្នុងតំបន់លំនៅឋានរបស់ពលរដ្ឋដែលនៅជើងភ្នំភ្លើង។ ទីភ្នាក់ងារកាត់បន្ថយគ្រោះមហន្តរាយជាតិរបស់ប្រទេសឥណ្ឌូណេស៊ី បាននិយាយថា ចំនួនអ្នកស្លាប់បានកើនឡើងដល់ ២២ នាក់ និង ៥៦ នាក់ បានរងរបួស ខណៈមនុស្ស ២២នាក់ ផ្សេងទៀតកំពុងបាត់ខ្លួននៅឡើយ។
ការផ្ទុះនេះបានបណ្តាលឱ្យខូចខាតផ្ទះប្រមាណជា ៣,០០០ ខ្នង នៅក្បែរតំបន់ភ្នំនោះ ហើយរូបភាពវីដេអូមួយចំនួនក៏បានបង្ហាញពីផ្ទះ ដែលកប់ក្រោមដំបូលផ្ទះរបស់ពួកគេ។ ទីភ្នាក់ងារស្វែងរក និងសង្គ្រោះជាតិនិយាយថា ចំនួនអ្នកស្លាប់ និងរបួសអាចកើនឡើងបន្ថែមទៀត ប៉ុន្តែប្រតិបត្តិការជួយសង្គ្រោះរបស់ខ្លួនត្រូវបានរារាំងដោយអាកាសធាតុអាក្រក់ ខណៈកម្មករព្យាយាមជីកយកកកាយដីភក់ដោយដៃ។ គួរឱ្យដឹងដែរថា ការផ្ទុះមួយនៅឆ្នាំ១៩៩៤ របស់ភ្នំ Semeru ក៏ធ្លាប់បណ្តាលឱ្យមនុស្សស្លាប់ច្រើនដែរ ប៉ុន្តែការផ្ទុះចុងក្រោយនេះ បានធ្វើឱ្យមានការខូចខាតកាន់តែធំ៕
អត្ថបទ៖ លីដា
ប្រភព៖ NHK