ពលរដ្ឋរាប់ម៉ឺននាក់ត្រូវបានជម្លៀសចេញ ខណៈផ្ទះរាប់រយខ្នងត្រូវបានបំផ្លាញ ដោយសារភ្លើងឆេះព្រៃយ៉ាងធំមួយ បានឆាបឆេះរាលដាលពាសពេញរដ្ឋ Colorado របស់សហរដ្ឋអាមេរិក។ ភ្លើងដែលកំពុងឆេះយ៉ាងសន្ធោសន្ធៅ កំពុងវាយប្រហារនៅក្នុងតំបន់ Boulder ភាគខាងជើងនៃទីក្រុង Denver ហើយការស្លាប់ និងរបួស ទំនងជានឹងមានកាន់តែច្រើនបន្ថែមទៀត។ មនុស្សប្រហែល ៣០,០០០ នាក់ នៅក្នុងទីក្រុង Louisville និង Superior ត្រូវចាកចេញពីផ្ទះរបស់ពួកគេនៅថ្ងៃព្រហស្បតិ៍ ហើយសេចក្ដីប្រកាសគ្រាអាសន្នមួយ ក៏ត្រូវបានប្រកាសដោយអភិបាលរដ្ឋលោក Jared Polis ។

ខ្យល់បក់ល្បឿនរហូតដល់ ១៦៩ គីឡូម៉ែត្រក្នុងមួយម៉ោង កំពុងឆាបឆេះពាសពេញតំបន់ បន្ទាប់ពីគ្រោះរាំងស្ងួតជាប្រវត្តិសាស្ត្រ។ ដំបូងឡើយភ្លើងឆេះបានកើតមាននៅតំបន់ជនបទ បន្ទាប់មកការឆេះបានបន្ដកើតឡើងនៅតំបន់ជាយក្រុងជាច្រើនទៀតនៃរដ្ឋ Colorado ។ ទន្ទឹមនឹងនេះ ខ្សែភ្លើងដែលត្រូវបានដួលរលំដោយខ្យល់បក់ខ្លាំង ក៏បានក្លាយទៅជាភ្លើងឆេះព្រៃបន្ថែមទៀត ដែលបំផ្លិចបំផ្លាញខ្លាំងបំផុតជាប្រវត្តិសាស្រ្តរបស់រដ្ឋ។

លោក Joe Pelle ស្នងការតំបន់ Boulder បាននិយាយថា ផ្ទះចំនួន ៣៧០ខ្នង បានឆេះនៅភាគខាងលិចនៃទីក្រុង Superior ហើយផ្ទះចំនួន ២១០ខ្នង ត្រូវបានបាត់បង់នៅក្នុងតំបន់ Old Town នៃក្រុង Superior ខណៈដែលអគារ​ផ្សារ​ទំនើប និង​សណ្ឋាគារ​ក៏​ត្រូវ​បាន​លេប​ត្របាក់​យ៉ាង​ពេញ​ទំហឹង។ គិតមកទល់ពេលនេះ មានពលរដ្ឋម្នាក់បានស្លាប់ និង ៦ នាក់ ផ្សេងទៀតបានរងរបួស ហើយវាទំនងជាមានអ្នករងរបួសច្រើនជាងនេះ នៅពេលរបាយការណ៍ត្រូវបានធ្វើបច្ចុប្បន្នភាព៕

អត្ថបទ៖ លីដា
ប្រភព៖ BBC