ក្លឹបអធិរាជសរ Real Madrid បានត្រៀមខ្លួនរួចរាល់ហើយសម្រាប់ផ្ដល់ខ្សែប្រយុទ្ធ Marco Asensio ទៅកាន់ក្លឹបតោខៀវ Chelsea ដើម្បីជាថ្នូរទិញខ្សែប្រយុទ្ធ Eden Hazard ពីក្លឹបតោខៀវ Chelsea ក្នុងពេលទីផ្សារដោះដូរកីឡាករខាងមុខនេះ។

ប្រធានក្លឹប Real Madrid លោក Florentino Perez មានបំណងចង់បានខ្សែប្រយុទ្ធសញ្ជាតិប៊ែលហ្ស៊ិករូបនេះមកជំនួសដំណែងខ្សែប្រយុទ្ធ Cristiano Ronaldo ដែលទើបតែចាកចេញពីក្លឹបអធិរាជសរ Real Madrid ទៅកាន់ក្លឹបសេះបង្កង់ Juventus កាលពីដើមរដូវកាលនេះកន្លងមក។ ពេលនេះក្លឹបអធិរាជសរ Real Madrid បានរៀបចំសំណើរឯកសាររួចរាល់ហើយដើម្បីផ្ដល់ជូនខ្សែប្រយុទ្ធ Marco Asensio ទៅកាន់ក្លឹបតោខៀវ Chelsea ដើម្បីជាថ្នូរក្នុងការដោះដូរយកខ្សែប្រយុទ្ធ Eden Hazard រួមជាមួយនឹងទឹកប្រាក់បន្ថែមពីលើដើម្បីយកខ្សែប្រយុទ្ធសញ្ជាតិប៊ែលហ្ស៊ិករូបនេះចាកចេញពីទឺកដីអង់គ្លេសមកកាន់ទឹកដីអេស្ប៉ាញ។

ទោះជាយ៉ាងណាកិច្ចព្រមព្រៀងមួយនេះទំនងជាមិនអាចបញ្ចប់នៅខែមករានោះទេ ខណៈដែលលោក Santiago Solari ដែលជាគ្រូបង្វឹកបណ្តោះអាសន្នរបស់ក្លឹបអធិរាជសរ Real Madrid កំពុងពេញចិត្តទំរង់លេងរបស់ខ្សែប្រយុទ្ធ Marco Asensio ហើយលោក Solari កំពុងមានការស្ទាក់ស្ទើរក្នុងការឲ្យ Asensio ចាកចេញពីក្លឹបអធិរាជសរ Real Madrid នៅក្នុងពាក់កណ្ដាលរដូវកាលនេះ។

បុត្រ

ប្រភព៖ Goal