លោក Emmanuel Macron បានឈ្នះការបោះឆ្នោតធ្វើជាប្រធានាធិបតីបារាំង ១ អាណត្តិទៀត នៅថ្ងៃអាទិត្យ ទី២៤ ខែមេសា ឆ្នាំ២០២២ ដោយបានយកឈ្នះគូប្រជែងរបស់គាត់ គឺលោកស្រី Marine Le Pen ហើយបានជំរុញឱ្យមានរលកនៃភាពធូរស្រាលនៅក្នុងទ្វីបអឺរ៉ុប ដែលក្រុមស្តាំនិយមត្រូវបានគេបញ្ចៀសមិនឱ្យមានអំណាចបាន។ លោក Macron ដែលជាអ្នកកណ្ដាលនិយម ត្រូវបានគេកំណត់ថា បានឈ្នះប្រហែល ៥៨% នៃសន្លឹកឆ្នោត នៅក្នុងការបោះឆ្នោតជុំទី២ បើធៀបនឹងលោកស្រី Le Pen ដែលមាន ៤២% នេះបើយោងតាមការព្យាករណ៍ដោយក្រុមហ៊ុនបោះឆ្នោត សម្រាប់ប៉ុស្តិ៍ទូរទស្សន៍បារាំងដោយផ្អែកលើគំរូនៃការរាប់សន្លឹកឆ្នោត។

លោក Macron គឺជាប្រធានាធិបតីបារាំងដំបូងគេ ដែលឈ្នះអាណត្តិទី២ ក្នុងរយៈពេល ២ ទសវត្សរ៍ចុងក្រោយ ប៉ុន្តែលទ្ធផលរបស់លោកស្រី Le Pen ក៏បង្ហាញពីភាពប្រទាក់ប្រទាញបំផុតផងដែរ នៅពេលដែលក្រុមស្តាំនិយមរបស់បារាំង មិនធ្លាប់ឡើងកាន់អំណាចនៅប្រទេសបារាំងនោះឡើយ ហើយវាក៏បានបង្ហាញពីភាពបែកបាក់ក្នុងសង្គមយ៉ាងខ្លាំង។ ប្រធានាធិបតីវ័យ ៤៤ ឆ្នាំរូបនេះ នឹងប្រឈមជាមួយបញ្ហាជាច្រើននៅក្នុងអាណត្តិទី២ របស់គាត់ ដោយចាប់ផ្តើមជាមួយនឹងការបោះឆ្នោតសភាក្នុងខែមិថុនា ខណៈការរក្សាសំឡេងភាគច្រើននឹងមានសារៈសំខាន់ក្នុងការធានាថា គាត់យល់ពីមហិច្ឆតារបស់គាត់ ក្នុងការកែទម្រង់ប្រទេសបារាំង។ លទ្ធផល​ត្រូវ​បាន​គេ​រំពឹង​ថា​ នឹង​ត្រូវ​បាន​បញ្ជាក់​ដោយ​លទ្ធផល​ផ្លូវការ​ពេញ​មួយ​យប់ ​ជាមួយ​នឹង​តួលេខ​ចុង​ក្រោយ​ដែល​ត្រូវ​កំណត់​នៅ​ថ្ងៃ​ចន្ទ៕

អត្ថបទ៖ លីដា
ប្រភព៖ Channel News Asia