ហេតុការណ៍ដ៏គួរអោយរន្ធត់មួយបានកើតឡើងនៅក្នុងការប្រកួត FINA World Aquatics Championships 2022 នៅទីក្រុង Budapest នៃប្រទេសហុងគ្រី កាលពីថ្ងៃទី ២២ មិថុនា ដោយកីឡាការីនី Anita Alvarez ដែល ជាអ្នករាំក្រោមទឹកជម្រើសជាតិសហរដ្ឋអាមេរិក បានសន្លប់បាត់ស្មារតីភ្លាមៗ ក្នុងអំឡុងពេលប្រកួតប្រជែង បណ្តាលអោយលិចចូលទៅបាតអាង។  ទោះជាយ៉ាងនេះក្ដី ជាសំណាងល្អគ្រូបង្វឹកគឺលោក Andrea Fuentes បានលោតចូលទៅជួយកូនក្រុមភ្លាមៗ បន្ទាប់មកក៏មានក្រុមសង្គ្រោះបន្ទាន់នៅក្នុងកម្មវិធីប្រកួតនេះចូលទៅជួយស្រង់យកកីឡាការីនីមកសង្គ្រោះបឋមបានសម្រេច។

បើតាមរបាយការណ៍​បញ្ជាក់​តថា នារី​វ័យ ២៥ ឆ្នាំ​រូប​នេះ​នៅ​តែ​សន្លប់ ខណៈ​នាង​ត្រូវ​បាន​គេ​យក​ទៅ​កាន់​មជ្ឈមណ្ឌល​វេជ្ជសាស្ត្រ​នៃ​អាង​ហែល​ទឹក ដោយក្នុងអំឡុងពេលនៃការជួយសង្គ្រោះនេះផងដែរបានទទួលសម្លេងទះដៃអបអរ និងលើកទឹកចិត្តពីសំណាកទស្សនិកជន ចំណែកក្រុមគ្រួសារ និងមិត្តភក្តិរបស់កីឡាករជម្រើសជាតិសហរដ្ឋអាមេរិកក៏ភ្ញាក់ផ្អើលជាមួយហេតុការណ៍ខាងលើនេះផងដែរ។ ចំណែកក្រុមរាំនៅក្រោមទឹករបស់សហរដ្ឋអាមេរិក បានចេញសេចក្តីថ្លែងការណ៍មួយថា កីឡាការីនី Alvarez មានសុវត្ថិភាព។ ជាមួយគ្នានេះ គ្រូបង្វឹក Fuentes បានរៀបរាប់លម្អិតថា “Anita មានទឹកនៅក្នុងសួតរបស់នាង ប៉ុន្តែអ្វីៗគឺល្អឥឡូវនេះ នាង​បាន​និយាយ​ថា​ នាង​ចង់​ទៅ​ប្រកួត​នៅ​វគ្គ​ផ្ដាច់ព្រ័ត្រ”។

គួរបញ្ជាក់ផងដែរថា យោងតាមរបាយការណ៍​ នេះមិនមែនជាលើកទីមួយទេ ដែល Alvarez ដួលសន្លប់ក្នុងទឹក ពោលគឺ នាងធ្លាប់សន្លប់ក្នុងការប្រកួតជម្រុះអូឡាំពិកឆ្នាំមុន ដែលនៅពេលនោះ ម្តាយរបស់ Alvarez បាននិយាយ ថានាងធ្លាប់សន្លប់ដូច​អ្នក​ដទៃ​ដែរ ប៉ុន្តែ​នាងមិនធ្លាប់ដួលសន្លប់ក្នុងអំឡុង​ពេល​ការ​ប្រកួត​កន្លង​មក​ទេ៕

អត្ថបទ៖ Bee

ប្រភព៖ sanook