អន្តរជាតិ

ម្ចាស់ Pub ដែលមានភ្លើងឆេះ និងបង្កឲ្យមនុស្ស ១៥នាក់បាត់បង់ជីវិតនៅប្រទេសថៃ ត្រូវបានចាប់ខ្លួន ខណៈរូបគាត់ត្រូវប្រឈមនឹងការជាប់គុករយៈពេល ១០ឆ្នាំ

BY: Pheakdey

: August 8, 2022

ថៃ៖ ម្ចាស់ Pub ដ៏ល្បីឈ្មោះមួយកន្លែងនៅក្នុងប្រទេសថៃ ដែលជាកន្លែងមានភ្លើងឆេះនិងបង្កឲ្យមានមនុស្សស្លាប់ជាច្រើននាក់កាលពីពេលកន្លងទៅ ត្រូវបានអាជ្ញាធរថៃធ្វើការឃាត់ខ្លួនបានហើយ ខណៈប៉ូលិសជំនាញកំពុងបញ្ជូនសំណុំរឿងទៅកាន់តុលាការដើម្បីធ្វើការផ្តន្ទាទោសទៅតាមផ្លូវច្បាប់ផងដែរ។ គួររម្លឹកថា កាលពីយប់ថ្ងៃទី៤ ឆ្លងចូលថ្ងៃទី៥ ខែសីហាកន្លងទៅ ពោលគឺនៅម៉ោង ១ រំលងអាធ្រាត្រ មានអគ្គីភ័យដ៏សន្ធោសន្ធៅមួយលេបត្របាក់ Pub មួយកន្លែងឈ្មោះ MOUNTAIN B នៅក្នុងក្រុងសត្យាហ៊ីបស្ថិតលើផ្លូវសុខុមវីតបាងណា ភូមិបាងណាត្រាត ភូមិ៧ ឃុំ ផ្លូតាហ្លួង ស្រុកសាតាហ៊ីប ខេត្តឈុនបុរី ភាគខាងត្បូងប្រទេសថៃ។

ភ្លាមៗក្រោយពេលកើតហេតុអាជ្ញាធរបានរកឃើញជនរងគ្រោះចំនួន ១៣នាក់បានស្លាប់បាត់បង់ជីវិតនៅកន្លែងកើតហេតុ និងមានមនុស្សជាង ៤០នាក់ផ្សេងទៀតបានរងរបួសធ្ងន់ធ្ងរ។ ប៉ុន្តែគិតត្រឹមពេលនេះតួលេខអ្នកស្លាប់បានកើនដល់ ១៥នាក់ហើយ ខណៈក្រុមជនរងគ្រោះមួយមួយចំនួនទៀតកំពុងតែស្ថិតនៅក្នុងស្ថានភាពធ្ងន់ធ្ងរខ្លាំងនៅឡើយ។

ជុំវិញសំណុំរឿងដ៏រសើបនេះ កាលពីថ្ងៃអាទិត្យ ទី៧ ខែសីហាម្សិលមិញនេះអាជ្ញាធរថៃបានប្រកាសថា អាចចាប់ខ្លួនម្ចាស់ Pub នោះបានហើយ ដោយរូបគាត់មានឈ្មោះថា Pongsiri Panprasng ឬហៅក្រៅ Sia Bee អាយុ ២៧ឆ្នាំ ហើយរូបគាត់ត្រូវរងនូវការចោទប្រកាន់ជាច្រើនករណីមានទាំងករណីបើកអាជីវកម្ម Pub ដោយគ្មានអជ្ញាប័ណ្ណ និងការធ្វេសប្រហែលដែលបង្កឲ្យមានមនុស្សស្លាប់ផងដែរ។ អាជ្ញាធរថៃបានបញ្ជាក់ថា បើយោងទៅតាមច្បាប់គឺម្ចាស់ Pub រូបនេះនឹងត្រូវប្រឈមនឹងការជាប់គុករហូតដល់ ១០ឆ្នាំ និងពិន័យជាប្រាក់ចំនួន ២០០,០០០បាត (៥,៥៨០ ដុល្លារអាមេរិក)ផងដែរ។

ចំណែកលោក Anucha Wongsrirat មេធាវីរបស់ Sia Bee បានបង្ហើបថា លោកឥឡូវនេះស្ថិតក្នុងស្ថានភាពផ្លូវចិត្តមិនល្អឡើយចំពោះឧបទ្ទវហេតុនេះ ដោយបានសារភាពកំហុសចំពោះរាល់ការចោទប្រកាន់។ ចំពោះអ្នកស្លាប់ និងរបួស ជាដំបូង ភាគីខាង Pub នឹងផ្តល់សំណង សម្រាប់អ្នកស្លាប់ នឹងផ្តល់ប្រាក់ឧបត្ថម្ភចំនួន ៥០,០០០ បាតឬជាង១,៣០០ដុល្លា ក្នុងមនុស្សម្នាក់ ចំណែកអ្នករងរបួសម្នាក់នឹងទទួលបាន ទឹកប្រាក់ចំនួន ១០,០០០បាត ឬ ជិត ៣០០ដុល្លា ហើយសូមទុកឱ្យអ្នកសារព័ត៌មានជួយផ្តល់ដំណឹងដល់អ្នកពាក់ព័ន្ធក្នុងហេតុការណ៍អគ្គិភ័យផង ទាំងសាច់ញាតិរបស់អ្នកស្លាប់ និងអ្នករបួស អាចទាក់ទងបានតាមរយៈទំព័រហ្វេសប៊ុកផេក “Mountain B” ដែលបច្ចុប្បន្នត្រូវបានចាត់ឱ្យទៅអ្នកគ្រប់គ្រងហាងដើម្បីព្យាយាមទាក់ទងគ្រប់ភាគី ។

ចំពោះរឿងក្តី នៅតែមិនអាចស្នើរសុំអោយមានការដាក់នៅក្រៅឃុំក្នុងដំណាក់កាលស៊ើបអង្កេតនេះបាន ប៉ុន្តែនឹងមានការដាក់លុយតម្កល់អោយនៅក្រៅឃុំទៅកាន់តុលាការ គិតជាចំនួនទឹកប្រាក់ ១លានបាត ឬជិត ៣មុឺនដុល្លា នៅថ្ងៃចន្ទនេះ៕