ក្មេងប្រុសវៀតណាមអាយុ ១០ឆ្នាំ ដែលធ្លាក់ចូលក្នុងប្រហោងគ្រឹះបេតុងជម្រៅ ៣៥ម៉ែត្រ ពេលនេះបានបាត់បង់ជីវិតហើយ

ប្រព័ន្ធផ្សព្វផ្សាយវៀតណាមបានឱ្យដឹងកាលពីថ្ងៃពុធ ទី០៤ ខែមករា ឆ្នាំ២០២៣ នេះថា ក្មេងប្រុសជនជាតិវៀតណាមអាយុ ១០ ឆ្នាំ ដែលបានធ្លាក់ចូលទៅក្នុងប្រហោងគ្រឹះបេតុង នៅឯការដ្ឋានសំណង់នៅកំឡុងថ្ងៃចូលឆ្នាំសកលនោះ ត្រូវបានគេបញ្ជាក់ថា បានស្លាប់ហើយ។ ក្រុមអ្នកជួយសង្គ្រោះបានចំណាយពេលជិត ១០០ ម៉ោង ដើម្បីព្យាយាមរំដោះកុមារា Ly Hao Nam ចេញពីប្រហោងគ្រឹះបេតុងជម្រៅ ៣៥ ម៉ែត្រ ប៉ុន្តែមិនបានទទួលជោគជ័យនោះទេ នេះបើតាមសម្តីមន្ត្រីរដ្ឋាភិបាលក្នុងតំបន់ម្នាក់បានរាយការណ៍។

អនុប្រធានខេត្ត Dong Thap លោក Doan Tan Buu បានឱ្យដឹងថា៖«អាជ្ញាធរបានកំណត់ថាជនរងគ្រោះបានបាត់បង់ជីវិតហើយ និងកំពុងព្យាយាមយកសាកសពរបស់គាត់មកធ្វើបុណ្យ»។

កុមារា Nam ត្រូវ​បាន​គេ​ឮ​យំ​សុំ​ជំនួយ​ភ្លាមៗ​ បន្ទាប់​ពី​គាត់​បាន​ធ្លាក់​ចូលប្រហោងគ្រឹះបេតុងដែល​មាន​អង្កត់ផ្ចិត ២៥ សង់ទីម៉ែត្រ កាល​ពី​ថ្ងៃ​សៅរ៍ នៅឯ​ការដ្ឋាន​សាងសង់​ស្ពាន​មួយ ​ក្នុង​ខេត្ត​ដីសណ្ត​ទន្លេ​មេគង្គ នៅពេលដែល​គាត់​បាន​ដើររក​ដែក​អេតចាយ​ជាមួយ​មិត្តភ័ក្តិ​។ រដ្ឋាភិបាលបាននិយាយថា កាលពីព្រឹកថ្ងៃពុធ នាយករដ្ឋមន្ត្រីវៀតណាម លោក Pham Minh Chinh បានជំរុញឱ្យក្រុមអ្នកជួយសង្គ្រោះ និងអាជ្ញាធរមូលដ្ឋាន ចល័តឧបករណ៍ និងកម្លាំងទាំងអស់ដែលចាំបាច់សម្រាប់ប្រតិបត្តិការនេះ៕

អត្ថបទ៖ លីដា
ប្រភព៖ Channel News Asia