រាជធានីភ្នំពេញ៖ នៅថ្ងៃទី១៣ ខែកញ្ញា ឆ្នាំ២០២៣ យោងតាមការចុះផ្សាយរបស់ ទូរទស្សន៍ជាតិកម្ពុជា ទទក បានឱ្យដឹងថា ក្រសួងសុខាភិបាល សម្រេចបិទ​ និងដកហូតលិខិតអនុញ្ញាត​​ចំនួន២កន្លែង​ បន្ទប់ពិគ្រោះព្យាបាលជំងឺត្រចៀក​ ច្រមុះ​ បំពង់ក​ សៀរហឺ​ និងបន្ទប់ពិគ្រោះព្យាបាលជំងឺទូទៅ​ ហែម​ ចាន់យុទ្ធី​ រាជធានីភ្នំពេញ។

សកម្មភាពចុះបិទនេះ​ ធ្វេីឡេីងបន្ទាប់ពីក្រុមការងារបច្ចេកទេសក្រសួងសុខាភិបាល​ រួមជាមួយមន្ទីរសុខាភិបាលនៃរដ្ឋបាលរាជធានីភ្នំពេញ​ និងរដ្ឋបាលរាជធានីភ្នំពេញ បានចុះពិនិត្យបន្ទប់ពិគ្រោះព្យាបាលជំងឺទាំងពីរទីតាំង​ កាលពីថ្ងៃទី០៧​ និងទី០៨ ខែកញ្ញា​ ឆ្នាំ២០២៣​ ដោយមិនគោរពលក្ខខណ្ឌបច្ចេកទេស​ មិនគោរពកិច្ចសន្យាធានាអះអាងពេលពេលស្នេីសុំបេីកបន្ទប់ពិគ្រោះព្យាបាលជំងឺ​។

ការចេញនូវបទបញ្ជានេះគឺដើម្បីពង្រឹងវិស័យសុខាភិបាលទាំងក្នុងក្របខណ្ឌរដ្ឋ និងឯកជន សំដៅលើកកម្ពស់សុខុមាលភាពប្រជាពលរដ្ឋឱ្យកាន់តែប្រសើរឡើង។ ទាំងនេះគឺជាការគិតគូររបស់ឯកឧត្តមរដ្ឋមន្រ្តី ដែលមានបទពិសោធន៍ច្រើនក្នុងវិស័យសុខាភិបាល ក៏ដូចជាកិច្ចគាំពារសុខភាពសាធារណៈ និងក្រោមការចង្អុលបង្ហាញរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលតែងតែគិតគូរចំពោះសុខុមាលភាពប្រជាពលរដ្ឋគ្រប់ពេលវេលា និងផ្ដល់ការណែនាំដាស់តឿនដល់អង្គភាពប្រតិបត្តិការសុខាភិបាលឱ្យបង្កើនការយកចិត្តទុកដាក់ចំពោះសុខភាពរបស់ប្រជាពលរដ្ឋទូទាំងប្រទេស។

នៅចំពោះមុខនឹងការណែនាំនេះ ឯកឧត្តម​រដ្ឋមន្ត្រី ក៏បានលើកទឹកចិត្តដល់អគ្គនាយកដ្ឋាន នាយកដ្ឋាន អង្គភាព និងមន្ត្រីរាជការដែលចំណុះក្រសួងសុខាភិបាល មានមន្ទីរសុខាភិបាល ២៥រាជធានី-ខេត្ត​ សូមអនុវត្តតាមបទបញ្ជានេះឱ្យបានម៉ឺងម៉ាត់ ដើម្បីចូលរួមចំណែកក្នុងការពង្រឹងវិស័យសុខាភិបាលជាតិ និងត្រូវតាមដានត្រួតពិនិត្យការអនុវត្តនៅតាមមន្ទីរពេទ្យ មន្ទីរសម្រាកព្យាបាល ក៏ដូចជាអង្គភាពឯកជន ដែលប្រតិបត្តិការលើការផ្ដល់សេវាសុខាភិបាល ក្នុងដែនសមត្ថកិច្ចរបស់ខ្លួនឱ្យមានប្រសិទ្ធភាពបំផុត មិនអាចលើកលែងចំពោះអង្គភាពណា ឬមន្ត្រីណា ឬបុគ្គលិកសុខាភិបាលណា ដែលប្រព្រឹត្តខុសនឹងនីតិវិធីច្បាប់បច្ចេកទេស វិជ្ជាជីវៈ ក្រមសីលធម៌នោះឡើយ ៕

ប្រភព៖ ទូរទស្សន៍ជាតិកម្ពុជា ទទក