ក្រសួងអប់រំ បញ្ជាក់ថា បេក្ខជនណាដែលយកសៀវភៅ ឬសំណៅឯកសារចូលមណ្ឌលប្រឡង នឹងមិនអនុញ្ញាតឱ្យចូលប្រឡង ហើយត្រូវកំណត់ឱ្យធ្លាក់
- September 14, 2023
រាជធានីភ្នំពេញ៖ នៅថ្ងៃទី១៤ ខែកញ្ញា ឆ្នាំ២០២៣ យោងតាមការចុះផ្សាយរបស់ ទីភ្នាក់ងារសារព័ត៌មានកម្ពុជា បានឱ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី៦ ខែវិច្ឆិកា ឆ្នាំ២០២៣ខាងមុខ ចំពោះបេក្ខជនដែលនាំយកនូវសៀវភៅ ឬសំណៅឯកសារជាប់ខ្លួនចូលមណ្ឌលប្រឡង នឹងមិនត្រូវអនុញ្ញាតឱ្យចូលប្រឡងឡើយ ហើយក៏ត្រូវបានកំណត់ឱ្យធ្លាក់។

តាមប្រការ៧ នៃប្រកាស បានបញ្ជាក់ថា បេក្ខជនដែលមានសកម្មភាពដូចជា យកជាប់នឹងខ្លួននូវសៀវភៅ ឯកសារ សំណៅឯកសារចូលក្នុងមណ្ឌលប្រឡង, លាក់ជាប់នឹងខ្លួននូវសៀវភៅ ឯកសារ ឬសំណៅឯកសារ ឬទូរស័ព្ទ ឬឧបករណ៍អេឡិចត្រូនិកគ្រប់ប្រភេទ ត្រូវចាត់ទុកថា មានបំណងលួចចម្លង និងមិនអនុញ្ញាតឱ្យចូលប្រឡងជាដាច់ខាត ហើយត្រូវបានកំណត់ឱ្យធ្លាក់ លើកលែងតែបេក្ខជននោះប្រគល់រាល់សៀវភៅ ឯកសារ ឬសំណៅឯកសារឱ្យគណៈមេប្រយោគមុនចូលមណ្ឌលប្រឡង ឬបន្ទប់ប្រឡង ហើយគណៈមេប្រយោគពុំទទួលខុសត្រូវរាល់ការបាត់បង់ឡើយ។
ជាមួយគ្នានេះដែរ បើយោងតាមប្រកាស៨ នៃប្រកាស បេក្ខជនដែលមានសៀវភៅឯកសារ ឬសំណៅឯកសារសរសេររូបមន្តលើបន្ទាត់ ឬក្រដាសដោយដែកចារ ការចម្លងរូបមន្ត ឬមេរៀននៅលើតុទុកជាមុន ការសរសេរលើបាតដៃ លើភ្លៅ លើទ្រនាប់ជើង លើកន្សែងជូតមុខ… ក្នុងបន្ទប់ប្រឡង, ចម្លងសំណៅឯកសារពីអ្នកដទៃ ឬយកកិច្ចការអ្នកដទៃមកដាក់នៅកន្លែងដែលខ្លួនអង្គុយ, អើតមើលសន្លឹកកិច្ចការអ្នកដទៃ, ប្រើប្រាស់ទូរសព្ទ ឬឧបករណ៍អេឡិចត្រូនិកគ្រប់ប្រភេទនៅក្នុងបន្ទប់ប្រឡង, អង្គុយខុសពីលេខតុរបស់ខ្លួន ដោយគ្មានការអនុញ្ញាតពីអនុរក្ស ឬរំកិលមកអង្គុយកៀកអ្នកដទៃ, រំកិលតុមកអង្គុយជាប់គ្នា ខុសពីប្លង់កំណត់ដោយគណៈមេប្រយោគ, បង្កលក្ខណៈ ឬផ្តល់ឱកាសឱ្យអ្នកដទៃចម្លង, ប្តូរសន្លឹកកិច្ចការគ្នា ប្តូរក្រដាសព្រាងគ្នា ឬផ្ទៀងផ្ទាត់ចម្លើយគ្នា ចម្លងគ្នាជាក់ស្តែង។ ទង្វើទាំងអស់នេះ ត្រូវចាត់ទុកថា ជាអំពើលួចចម្លង ត្រូវបញ្ឈប់មិនឱ្យប្រឡងបន្តទៀត និងត្រូវកំណត់ឱ្យធ្លាក់ជាស្វ័យប្រវត្តិ។
សូមបញ្ជាក់ថា បើយោងតាមប្រការ៤ នៃប្រកាស ក្នុងដំណើរការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០២៣នេះ បេក្ខជនត្រូវបានអនុញ្ញាតឱ្យយកចូលក្នុងបន្ទប់ប្រឡងនូវសម្ភារប្រើប្រាស់ដែលក្រសួងអប់រំ យុវជន និងកីឡាអនុញ្ញាតឱ្យប្រើ ដូចជា ៖ ប៊ិចពណ៌ខៀវ ខ្មៅដៃ បន្ទាត់ ដែកឈាន រ៉ាព័រទ័រ សម្រាប់ប្រាស់ផ្ទាល់ខ្លួននៅពេលដំណើរការប្រឡង តែប៉ុណ្ណោះ៕




- Share This Post:






