ខេត្តព្រះសីហនុ៖ នៅព្រឹកថ្ងៃទី២៨ ខែកញ្ញា ឆ្នាំ២០២៣ យោងតាមការចុះផ្សាយរបស់ រដ្ឋបាលខេត្តព្រះសីហនុ បានចេញសេចក្តីជូនដំណឹង ស្តីពីការបើកចរាចរឡើងវិញនៅលើកំណាត់ផ្លូវជាតិលេខ៤ ក្នុងភូមិសាស្ត្រស្រុកកំពង់សីលា ខេត្តព្រះសីហនុ។

រដ្ឋបាលខេត្តព្រះសីហនុ សូមជម្រាបជូនដល់បងប្អូនប្រជាពលរដ្ឋ ម្ចាស់ក្រុមហ៊ុនដឹកជញ្ជូនដោយរថយន្ត និងសាធារណជនឱ្យបាន ជ្រាបថា៖ ដោយស្ថានភាពទឹកភ្លៀងកាលពីយប់មិញមានការថមថយ រហូតមកដល់ព្រឹកថ្ងៃទី២៨ ខែកញ្ញា ឆ្នាំ ២០២៣នេះ ជំនន់ទឹកភ្លៀងបានស្រុកចុះផុតពីតួផ្លូវជាតិលេខ៤ (ចំណុចស្ពានស្ទឹងសំរោង ចន្លោះគីឡូម៉ែត្រលេខ ១១៥-១១៦ និងចំណុចចន្លោះគីឡូម៉ែត្រលេខ១៥៣-១៥៤) ក្នុងភូមិសាស្ត្រស្រុកកំពង់សីលា ខេត្តព្រះសីហនុ ដែលអាចធ្វើចរាចរឆ្លងកាត់បាន។

ដូចនេះ រដ្ឋបាលខេត្តព្រះសីហនុ សម្រេចបើកឱ្យធ្វើចរាចរធម្មតាឡើងវិញ លើកំណាត់ផ្លូវជាតិលេខ៤ ក្នុងភូមិសាស្ត្រស្រុកកំពង់សីលា ខេត្តព្រះសីហនុ ចាប់ពីព្រឹកថ្ងៃទី២៨ ខែកញ្ញា ឆ្នាំ២០២៣ នេះតទៅ។ ចំពោះ ការប្រែប្រួលស្ថានភាពជំនន់ទឹកភ្លៀងតាមផ្លូវជាតិលេខ៤នេះ រដ្ឋបាលខេត្តព្រះសីហនុ នឹងជូនដំណឹងជាបន្តបន្ទាប់ ទៀត ទៅតាមស្ថានភាពជាក់ស្ដែង ៕

ប្រភព៖ រដ្ឋបាលខេត្តព្រះសីហនុ