រាជធានីភ្នំពេញ៖ នៅថ្ងៃទី០១ ខែវិច្ឆិកា ឆ្នាំ២០២៣ យោងតាមគណនីហ្វេសប៊ុកផ្ទាល់របស់ Dr. Beat Richner បានឱ្យដឹងថា កុមារីតូចម្នាក់ រងការរលាកខ្លោចស្បែកកម្រិត២ អស់លើផ្ទៃមុខនិងដងខ្លួនចំនួន៦០ភាគរយ ដោយសារផ្ទុះកំប៉ុងហ្គាស កុមារីតូចនេះ ត្រូវបានមន្ទីរពេទ្យគន្ធបុប្ផាភ្នំពេញ ថែទាំព្យាបាលក្នុងបន្ទប់វះកាត់៩ដង រហូតសង្គ្រោះឱ្យមានជីវិតឡើងវិញ។

តាមរយៈខ្លឹមសារក្នុងគណនីហ្វេសប៊ុករបស់ Dr. Beat Richner បានបញ្ជាក់ថា​៖ «កុមារីតូច អាយុ២ឆ្នាំ មកពីខេត្តកណ្តាល រងការរលាកខ្លោចស្បែកកម្រិត២ អស់លើផ្ទៃមុខនិងដងខ្លួនចំនួន៦០% ដោយសារផ្ទុះកំប៉ុងហ្គាស ឪពុកនាងក៏រងរបួសរលាកជើងទាំង២ផងដែរ រាល់ការរលាកទាំងអស់តែងមានហានិភ័យខ្ពស់ និងពិបាកព្យាបាល ហើយប្រើពេលវេលាយូរ នាងតូចត្រូវបានថែទាំព្យាបាលកោសលស្បែកលាងរបួស ក្នុងបន្ទប់វះកាត់៩ដង និងធ្វើការបណ្តុះផ្សាំស្បែក (skin graft) អស់រយៈពេល២៧ថ្ងៃ ឯឪពុកនាងក៏ត្រូវបានព្យាបាលបានជាសះស្បើយផងដែរ។ »

Dr. Beat Richner ក៏សូមអរគុណក្រុមគ្រូពេទ្យជំនាញវះកាត់និងសង្រ្គោះបន្ទាន់ ដែលបានសង្គ្រោះជីវិត២នេះ អរគុណសមាគមគ្រូពេទ្យស្ម័គ្រចិត្តយុវជនសម្តេចតេជោ- TYDA ដែលបានយកចិត្តទុកដាក់ដល់សុខទុក្ខនិងឧបត្ថម្ភថវិកានិងស្មារតី ដល់ចៅស្រី ក្រោមការណែនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អរគុណមូលនិធិគន្ធបុប្ផាកម្ពុជានិងមូលនិធិគន្ធបុប្ផាស្វីស អរគុណក្រសួងសុខាភិបាល
អរគុណ ដល់សប្បុរសជនគ្រប់លំដាប់ថ្នាក់ ដែលតែងតែឧបត្ថម្ភគាំទ្រដល់ដំណើរការមន្ទីរពេទ្យគន្ធបុប្ផា ៕

ប្រភព៖ Dr. Beat Richner