រថយន្តមួយគ្រឿង ត្រូវបានឆាបឆេះអស់ទាំងស្រុងនៅក្រុងព្រះសីហនុ ដោយសារឆ្លងចរន្តភ្លើងក្នុងរថយន្ត
ខេត្តព្រះសីហនុ៖ នៅថ្ងៃអង្គារ ១៣កើត ខែ បុស្ស ឆ្នាំ ថោះ បញ្ចស័ក ពុទ្ឋសករាជ ២៥៦៧ ត្រូវនឹងថ្ងៃ អង្គារ ទី ២៣ ខែមករា ឆ្នាំ ២០២៤ វេលាម៉ោង ១០:៣០ នាទីព្រឹក មានករណីអគ្គិភ័យឆេះរថយន្តមួយគ្រឿង ដែលស្ថិតនៅចំណុចក្រុម១ ភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ ម្ចាស់ឡានរងគ្រោះឈ្មោះ សួរ ឌីណា ភេទ ប្រុស អាយុ ៤១ ឆ្នាំ ជនជាតិខ្មែរ មានស្រុកកំណើតនៅ សង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ។
យោងតាមការចុះផ្សាយរបស់ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ មុននេះបន្តិចបានឱ្យដឹងលម្អិតថា រថយន្តដែលបានឆេះគឺម៉ាក MERCEDES BENZ V250 ពណ៌ ស ដែលមានស្លាកលេខ ភ្នំពេញ 2BN 5585 ដោយឆេះអស់ទាំងស្រុង។ ចំពោះមូលហេតុ គឺបណ្ដាលមកពីឆ្លងចរន្តភ្លើងក្នុងរថយន្តបង្កជាអគ្គិភ័យតែម្តង។
ទន្ទឹមនឹងនេះដែរហេតុការណ៍នេះ មិនបង្កឱ្យមានមនុស្សរងរបួស និងស្លាប់ឡើយ ដោយករណីអគ្គិភ័យខាងលើនេះកងកម្លាំងការិយាល័យបង្ការពន្លត់អគ្គិភ័យនិងសង្គ្រោះ របស់ស្នងការដ្ឋាននគរបាលខេត្តព្រះសីហនុ បានចេញរថយន្តពន្លត់អគ្គិភ័យចំនួន ០១ គ្រឿង និងបានប្រើប្រាស់ទឹកអស់ចំនួន ០១ រថយន្ត៕
ប្រភព៖ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ