កីឡាករខ្សែបំរើរបស់បិសាចក្រហមសញ្ជាតិបារាំង Paul Pogba បាននិយាយបង្ហើបថារូបគាត់អាចនឹងចាកចេញពីក្លឹប Manchester United ដោយបានលើកឡើងថា ការទៅលេងជាមួយក្រុម Real Madrid គឺជាក្តីសុបិន្តរបស់លោក។ មិនតែប៉ុណ្ណោះ Pogba ធ្លាប់មានពាក្យចចាមអារ៉ាមថានឹងចង់ចាក់ចេញពី Old Trafford នៅពាក់កណ្តាលរដូវកាលនេះដោយសារតែមិនសូវសប្បាយចិត្តជាមួយអតីតអ្នកចាត់ការទូទៅលោក Jose Mourinho។ កាលពីនៅក្រោមការដឹកនាំរបស់គ្រូបង្វឹកសញ្ជាតិប៉ុកទុយហ្គាល Mourinho មិនសូវបានដាក់អោយ ខ្សែបំរើរូបនេះលេងប៉ុន្មានទេ និងបានទំលាក់ Pogba ពីអនុប្រធានក្រុមថែមទៀតផង។

ទោះបីជាយ៉ាងណាក៏ដោយ បន្ទាប់ពីលោក Mourinho ចុះចេញពីតំណែងនៅក្នុងខែធ្នូឆ្នាំមុននេះ Pogba  មានអារម្មណ៍សប្បាយចិត្តឡើងវិញបន្ទាប់ពី លោក Solskjear មកដឹកនាំបន្ត។ បន្ថែមពីនេះទៅទៀត United បានផ្លាស់ប្តូរខ្លាំង និងឡើងទំរង់លេងមិនថានៅក្នុងលីគ ឬពានធំនៅក្នុងទ្វីបអឺរ៉ុបនោះទេ បន្ទាប់ពីលោក Solskjear ឡើងមកធ្វើជាអ្នកចាត់ការទូទៅបណ្តោះអាសន្នបន្ត រហូតដល់ថ្នាក់ Pogba សង្ឃឹមថា គ្រូបង្វឹកសញ្ជាតិណូវែររូបនេះនឹងក្លាយជាគ្រូបង្វឹកពេញសិទ្ធនៅក្នុងរដូវកាលក្រោយៗទៀត។ ប៉ុន្តែ អនាគតរបស់ Pogba អាចនឹងត្រូវឃ្លាតឆ្ងាយពី Old Trafford បន្ទាប់ពីកីឡាករវ័យ ២៦ឆ្នាំរូបនេះបានលើកសរសើរពីក្លឹប Real Madrid នៅក្នុងការធ្វើសន្និសីទកាសែតជាមួយក្រុមជំរើសជាតិបារាំងកាលពីថ្ងៃពុធនេះ។

ហើយ Pogba បាននិយាយថា ”ដូចដែលខ្ញុំតែងតែនិយាយចឹង Real Madrid គឺជាក្រុមក្នុងក្តីសុបិន្តសំរាប់អ្នករាល់គ្នា ហើយវាគឺជាក្លឹបធំមួយក្នុងចំនោមក្លឹបធំជាងគេបង្អស់លើលោក”  ហើយគាត់បានបន្ថែមទៀតថា ”ឥឡូវនេះមាន Zinane ជាគ្រូបង្វឹកថែមទៀតផង ហើយជាក្តីស្រមៃសំរាប់អ្នកដែលចូលចិត្តបាល់ទាត់ បើសំរាប់ខ្ញុំនៅពេលនេះ ខ្ញុំគឺនៅជាមួយ Manchester United ប៉ុន្តែពួកយើងមិនទាន់ដឹងពីអនាគតថាទៅជាយ៉ាងណាទេ។ ខ្ញុំសប្បាយចិត្តនៅជាមួយ Machester ពេលនេះ”៕

អត្ថបទ៖ សុគុណា
ប្រភព៖ Goal.com