រាជធានីភ្នំពេញ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានអំពាវនាវឱ្យប្រជាពលរដ្ឋ ត្រូវប្រុងប្រយ័ត្នខ្ពស់ចំពោះបច្ចេកវិទ្យា AI បន្ទាប់ពីរកឃើញថា ក្រុមឧក្រិដ្ឋជនបានឆ្លៀតឱកាសប្រើប្រាស់បច្ចេកវិទ្យា AI ដើម្បីធ្វើការបន្លំឆបោកជនរងគ្រោះ។ Artificial Intelligence (AI) សំដៅលើ ជ្រុងមួយនៃវិទ្យាសាស្ត្រកុំព្យូទ័រផ្តោតលើការបង្កើតសុសវែរ កម្មវិធី ឬឧបករណ៍ ដែលមានសមត្ថភាពអាចធ្វើការសម្រេចចិត្តដោយខ្លួនឯងបាន ឬធ្វើសកម្មភាពជំនួសមនុស្សបាន។

អគ្គនាយកដ្ឋានបច្ចេកវិទ្យាឌីជីថល បានបន្តថា បច្ចុប្បន្នយើងសង្កេតឃើញការប្រើប្រាស់បច្ចេកវិទ្យា AI កំពុងពេញនិយមមានការគាំទ្រយ៉ាងខ្លាំងពីសំណាកអ្នកប្រើប្រាស់។ ទន្ទឹងគ្នានេះ AI ក៏បានបង្កហានិភ័យដល់អ្នកប្រើប្រាស់ផងដែរ ប្រសិនបើយើងពុំស្វែងយល់អំពីហានិភ័យនៃការប្រើប្រាស់បច្ចេកវិទ្យានេះ។

យោងតាមការស្រាវជ្រាវរបស់ក្រុមការងារបច្ចេកទេស ក្រុមឧក្រិដ្ឋបានជនឆ្លៀតឱកាសប្រើប្រាស់បច្ចេកវិទ្យា AI ដើម្បីធ្វើការបន្លំឆបោកជនរងគ្រោះមានដូចជា៖
– Deepfakes: គឺការក្លែងបន្លំជាសម្លេង និងរូបភាពជាជនរងគ្រោះ
– ChatGPT phishing: គឺជាការបង្កើតសំណេរដោយក្លែងបន្លំ ដើម្បីផ្ញើទៅកាន់ជនរងគ្រោះ
– Voice cloning: គឺជាការក្លែងបន្លំសម្លេងរបស់ជនរងគ្រោះ។

នាយកដ្ឋានការពារសុវត្ថិភាពបច្ចេកវិទ្យាឌីជីថល នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ សូមជម្រាបជូនដល់សាធារណៈជនមានការប្រុងប្រយ័ត្នខ្ពស់ចំពោះបច្ចេកវិទ្យា AI ដូចខាងក្រោម៖

១. សូមកុំទំនាក់ទំនងជាមួយជនប្លែកមុខលើបណ្តាញសង្គម
២. សូមកុំបង្ហាញព័ត៌មានផ្ទាល់ខ្លួនដូចជា អ៉ីម៉ែល អត្តសញ្ញាណបុគ្គល ឬលេខទូរសព្ទ នៅលើបណ្តាញសង្គម
៣. ប្រសិនបើសាច់ញាតិផ្ញើសារសម្លេងមកពាក់ព័ន្ធជាមួយនឹងប្រាក់ សូមពិភាក្សា ឬខលសួរបញ្ជាក់ តាមរយៈលេខទូរសព្ទដៃរបស់បុគ្គលផ្ទាល់
៤. សូមកុំបង្ហោះលេខកាតធនាគារចែកចាយលើបណ្តាញសង្គម
៥.សូមត្រួតពិនិត្យគណនីធនាគារ និងគណនីបណ្តាញសង្គមឲ្យបានទៀងទាត់ និងដាក់លេខសម្ងាត់ឲ្យបានត្រឹមត្រូវ ៕

ប្រភព៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ General Department of Digital Technology and Media