កាលពីថ្មីៗនេះ មានព័ត៌មានជាច្រើនបានលើកឡើងថា កីឡាករសញ្ជាតិបារំាង Mbappe អាចនឹងចាកចេញពីក្លឹប PSG ហើយចាកចេញទៅលេងនៅក្នុងទឹកដី Bernebua នៅរដូវកាលក្រោយនេះ។ ពេលនេះអ្នកគាំទ្រក្លឹប PSG អស់ចំងល់ហើយថា Kylian Mbappe នឹងមិនចាកចេញពីក្លឹបទៅ Real Madrid នៅក្នុងឆ្នាំនេះនោះទេ។ គួរអោយដឹងផងដែរថា កីឡាករ Mbappe រកបាន Hat-trick កាលពីយប់មិញនេះដោយឈ្នះក្រុមចាស់របស់ខ្លួន Monaco ក្នុងលទ្ធផល ៣ទល់នឹង១ ហើយត្រូវបានបញ្ជាក់ថាក្រុម PSG ជាក្រុមម្ចាស់ជើងឯកក្នុងលីគកំពូលបារាំង បន្ទាប់ពីក្រុម Lille បានត្រឹមស្មើរជាមួយ Toulouse កាលពីថ្ងៃសៅរ៍មុននេះ។

កីឡាករសញ្ជាតិបារាំងរូបនេះមានទំនាក់ទំនងជាមួយក្លឹបយក្សអេស៉្បាញតាំងពីគាត់នៅរួមដំបូលជាមួយក្លឹបចាស់ Monaco មកម្ល៉េះ។ ហើយក្រោយមកបន្ទាប់ពីគ្រូបង្វឹកចាស់របស់ Real Madrid លោក Zinedine Zidane ត្រឡប់មកវិញនៅក្នុងខែមិនា ការផ្សារភ្ជាប់នេះក៏ត្រូវបានរៀបចំឡើងវិញ ខណៈដែល Real Madrid ពេលនេះកំពុងតែប្រមាញ់នាំយកតារាបាល់ទាត់ជាច្រើនដើម្បីយកមកជំនួសខ្លាចាស់ Ronaldo ដែលបានផ្លាស់ចេញទៅ Juventus កាលពីរដូវកាលមុននេះ។ ប៉ុន្តែ Mbappe ដែលជាកីឡាករវ័យក្មេងជាងគេដែលរកបាន ៣០គ្រាប់នៅក្នុងមួយរដូវកាលរូបនេះ បានលើកឡើងថាគាត់នឹងនៅជាមួយ PSG បន្តទៀត។ ក្នុងនោះគាត់បាននិយាយថា ” បាទខ្ញុំច្បាស់លាស់ថានឹងនូវបន្តទៀត ហើយខ្ញុំកំពុងតែវិនិយោគលើគំរោងរបស់ខ្ញុំនៅទីនេះ” គាត់ប្រាប់ទៅកាសែត Canal Plus៕

អត្ថបទ៖ សុគុណា
ប្រភព៖ FoxSportsAsia