ទ្រព្យសម្បត្តិសរុបរបស់លោក Elon Musk បានកើនឡើងដល់ជាង ៤៤៧ពាន់លានដុល្លារ ក្រោយពេលលោក Donald Trump ជាប់ឆ្នោតជាប្រធានាធិបតីអាមេរិក

អាមេរិក៖ ទ្រព្យសម្បត្តិរបស់លោកមហាសេដ្ឋី Elon Musk បានកើតឡើងយ៉ាងឆាប់រហ័សក្រោយលោក Donald Trump បានជាប់ឆ្នោតក្លាយជាប្រធានាធិបតីអាមេរិក ខណៈគិតត្រឹមពេលនេះទ្រព្យសម្បត្តិសរុបរប​ស់មហាសេដ្ឋីវ័យ ៥៣ឆ្នាំរូបនេះ ត្រូវបានគេប៉ាន់ប្រមាណថា បានកើនឡើងរហូតដល់ជាង ៤០០ពាន់លានដុល្លារឯណោះ។ បើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃព្រហស្បតិ៍ ទី១២ ខែធ្នូនេះបានបញ្ជាក់ថា ការកើនឡើងនៃប្រាក់ចំណូលដ៏ច្រើននិងឆាប់រហ័សបំផុតនេះក៏ជារឿងថ្មីមួយនៅក្នុងប្រវត្តិសាស្រ្តពិភពលោកផងដែរ។

គួរកត់សម្គាល់ថា ក្រោយពេលលោក Donald Trump បានជាប់ឆ្នោតជាប្រធានាធិបតីអាមេរិកភ្លាម ភាគហ៊ុននៅក្នុងក្រុមហ៊ុនធំៗរបស់លោក Elon Musk បានកើនឡើងយ៉ាងគំហុកតែម្តង ដូចជាភាគហ៊ុននៅក្នុងក្រុមហ៊ុន SpaceX បានកើនឡើងយ៉ាងខ្លាំង ដែលធ្វើឱ្យលោក Elon Musk អាចរកបានប្រាក់ចំណូលផ្ទាល់ខ្លួនបានប្រមាណជា ៥០ពាន់លានដុល្លារ ខណៈភាគហ៊ុននៅក្នុងក្រុមហ៊ុន Tesla បានកើនឡើងក្នុងកម្រិតដ៏ខ្ពស់មិនធ្លាប់មានផងដែរនៅដើមសប្តាហ៍នេះ។ ប្រភពខាងលើបានបន្តថា បើគិតសរុបអំពីប្រាក់ចំណូលដែលលោក Elon Musk អាចរកបានក្នុងរយៈពេលមួយខែមកនេះគឺចំនួន ៦២,៨ ពាន់លានដុល្លា ដែលរុញឱ្យទ្រព្យសម្បត្តិសរុបរបស់គាត់ដោយគិតត្រឹមពេលនេះកើនឡើងដល់ខ្ទង់ ៤៤៧ពាន់លានដុល្លារ ហើយលោកក៏ក្លាយជាអ្នកមានទ្រព្យសម្បត្តិច្រើនជាងគេបំផុតផងដែរ៕

អត្ថបទ៖ ភក្តី

ប្រភព៖ The Strait Time