លោក ដូណាល់ ត្រាំ ដាក់លក់មួក “Trump 2028” ដែលជាឆ្នាំបោះឆ្នោតសម្រាប់អាណត្តិបន្ទាប់ក្នុងតម្លៃ ៥០ដុល្លារ

អាមេរិក៖ ផ្សារ Online របស់លោកប្រធានាធិបតីអាមេរិក ដូណាល់ ត្រាំ បានដាក់លក់មួកគួរឱ្យចាប់អារម្មណ៍បំផុតមួយ ពោលគឺមាននិមិត្តសញ្ញា “Trump 2028” ដែលជាឆ្នាំនៃការបោះឆ្នោតជ្រើសរើសប្រធានាធិបតីសហរដ្ឋអាមេរិកក្នុងអាណត្តិបន្ទាប់ទៀត នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅក្នុងថ្ងៃសុក្រ ទី២៥ ខែមេសា។ មួកពណ៌ក្រហមជាមួយនិងសារនយោបាយគួរឱ្យភ្ញាក់ផ្អើលនេះត្រូវបានដាក់លក់ក្នុងតម្លៃរហូតដល់ ៥០ដុល្លារ។

គួរបញ្ជាក់ជូនថា យោងទៅតាមច្បាប់រដ្ឋធម្មនុញ្ញនៅសហរដ្ឋអាមេរិកបានកំណត់ឱ្យប្រធានាធិបតីម្នាក់អាចកាន់តំណែងកំពូលមួយនេះបានត្រឹមតែ ២អាណត្តិប៉ុណ្ណោះ បើទោះជាអាណត្តិនៃការដឹកនាំនោះជាប់គ្នា ឬមិនជាប់គ្នាក៏ដោយ។ ដូចនេះសម្រាប់លោកប្រធានាធិបតី ដូណាល់ ត្រាំ ដែលចង់ឈរឈ្មោះជាបេក្ខភាពប្រធានាធិបតីអាមេរិកនៅក្នុងអាណត្តិបន្ទាប់ទៀតនោះ គឺជារឿងផ្ទុយពីច្បាប់រដ្ឋធម្មនុញ្ញទាំងស្រុង ដ្បិតរូបគាត់ធ្លាប់បានកាន់តំណែង ២អាណត្តិរួចមកហើយ ពោលគឺអាណត្តិឆ្នាំ ២០១៧-២០២១ និងអាណត្តិ ឆ្នាំ២០២៥-២០២៩។

សូមរម្លឹកជូនថា កាលពីសប្តាហ៍មុន លោក ដូណាល់ ត្រាំ ធ្លាប់បានប្រាប់អ្នកកាសែតថា លោកពិតជាមានបំណងចង់ឈរឈ្មោះជាបេក្ខភាពប្រធានាធិបតីអាមេរិកសម្រាប់អាណត្តិទី៣ ហើយវាពិតជាអាចទៅរួចក្នុងការកែប្រែច្បាប់ខាងលើនេះ តែលោកបដិសេធមិនបញ្ជាក់ពីនីតិវិធីលម្អិតនោះទេ៕

អត្ថបទ៖ ភក្តី

ប្រភព៖ បាងកកប៉ុស្តិ៍