ចិន៖ របាយការណ៍មួយបានបង្ហាញថា ប្រទេសចិនកំពុងបង្កើតនិងដំឡើងរោងចក្រមនុស្សយន្ត (Factory Robot) ច្រើនជាងប្រទេសណាៗទាំងអស់នៅទូទាំងពិភពលោក រួមទាំងសហរដ្ឋអាមេរិកផងដែរ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២៦ ខែកញ្ញា។ សូមបញ្ជាក់ជូនថា រោងចក្រមនុស្សយន្ត (Factory Robot) ខាងលើនេះគឺសំដៅដល់ប្រភេទរោងចក្រ ដែលមានប្រតិបត្តិការភាគច្រើនធ្វើឡើងដោយមនុស្សយន្ត ឬម៉ាស៊ីនស្វ័យប្រវត្តិជំនួយឱ្យកម្លាំងពលកម្មម​នុស្ស។

យោងតាមរបាយការណ៍មួយរបស់អង្គការ International Federation of Robotics ដែលទើបបានចុះផ្សាយកាលពីថ្ងៃទី២៥ ខែកញ្ញា ឆ្នាំ២០២៥នេះ បានឱ្យដឹងថា គិតត្រឹមឆ្នាំ២០២៤ នៅប្រទេសចិនទាំងមូលមានការប្រើប្រាស់មនុស្សយន្ត ឬម៉ាស៊ីនស្វ័យប្រវត្តិនៅតាមរោងចក្រជាង ២លានគ្រឿងរួចទៅហើយ ខណៈចិនក៏មានគម្រោងបង្កើនការប្រើប្រាស់មនុស្សយន្ត ឬម៉ាស៊ីនស្វ័យប្រវត្តិជំនាន់ថ្មីជាច្រើនគ្រឿងបន្ថែមទៀងផងដែរក្នុងឆ្នាំនេះ និងនៅក្នុងឆ្នាំបន្តបន្ទាប់ទៀត។ ប្រភពខាងលើបានបន្តថា ជាមួយនឹងតួលេខនៃការប្រើប្រាស់មនុស្សយន្ត ឬម៉ាស៊ីនស្វ័យប្រវត្តិជាង ២លានគ្រឿងខាងលើនេះ បានធ្វើឱ្យចិនក្លាយជាប្រទេស ដែលមានការប្រើប្រាស់មនុស្សយន្ត ឬម៉ាស៊ីនស្វ័យប្រវត្តិច្រើនជាងគេបំផុតនៅលើពិភពលោក និងច្រើនជាងបណ្តាលប្រទេសអស់នៅលើពិភពលោកបូកបញ្ចូលគ្នាទៀតផង៕

អត្ថបទ៖ ភក្តី

ប្រភព៖ The Strait Time