គ្រឹះស្ថានសិក្សាទាំងអស់ នៅខេត្តបន្ទាយមានជ័យ នឹងបើកដំណើរការឡើងវិញចាប់ពីថ្ងៃទី ៥ ខែមករាតទៅ លើកលែងតែសាលាបឋមសិក្សាជោគជ័យ ព្រៃចាន់ និងបន្ទាយមានឬទ្ធិ
យោងទៅតាមការចុះផ្សាយរបស់ ក្រសួងព័ត៌មាន នៅព្រឹកថ្ងៃទី ២ ខែមករា ឆ្នាំ ២០២៦ នេះ បានឱ្យដឹងថា គ្រឹះស្ថានសិក្សាទាំងអស់ នៅខេត្តបន្ទាយមានជ័យ នឹងបើកដំណើរការឡើងវិញចាប់ពីថ្ងៃទី ៥ ខែមករា ឆ្នាំ ២០២៦ តទៅ លើកលែងតែសាលាបឋមសិក្សាជោគជ័យ ព្រៃចាន់ និងបន្ទាយមានឬទ្ធិ។
យោងតាមស្មារតីអង្គប្រជុំរបស់ រដ្ឋបាលខេត្តបន្ទាយមានជ័យ មន្ទីរអប់រំ យុវជន និងកីឡាខេត្ត បានបញ្ជាក់ថា គ្រឹះស្ថានសិក្សាទាំងអស់នឹងបើកដំណើរការបង្រៀន និងរៀនឡើងវិញនៅថ្ងៃទី ៥ ខែមករា ឆ្នាំ ២០២៦។
តាមសេចក្តីណែនាំរបស់ មន្ទីរអប់រំ យុវជន និងកីឡាខេត្តបន្ទាយមានជ័យ បានបញ្ជាក់ផងដែរថា គ្រឹះស្ថានសិក្សាទាំងអស់នឹងបើកដំណើរការឡើងវិញបាន លើកលែងតែសាលាបឋមសិក្សា ជោគជ័យ សាលាបឋមសិក្សា ព្រៃចាន់ (ស្រុកអូរជ្រៅ) សាលាបឋមសិក្សា បន្ទាយមានឬទ្ធិ និងអនុវិទ្យាល័យ បន្ទាយមានឬទ្ធិ (ស្រុកថ្មពួក) នៅពុំទាន់អាចដំណើរការបានទេ។
សូមជម្រាបជូនថា ក្រោយកម្ពុជា-ថៃ បានចុះហត្ថលេខាលើកិច្ចព្រៀមព្រៀងបទឈប់បាញ់បន្ទាន់នៅនឹងកន្លែង កាលពីវេលាម៉ោង ១២និង០០នាទីថ្ងៃត្រង់ កាលពីថ្ងៃទី ២៧ ខែធ្នូ ឆ្នាំ ២០២៥ សភាពការណ៍នៅព្រំដែនមានសភាពស្ងប់ស្ងាត់ ដែលបង្កលក្ខណៈឱ្យប្រជាពលរដ្ឋភៀសសឹក បានវិលត្រឡប់ទៅផ្ទះសម្បែងវិញបណ្តើរៗ។ ចំណែកសេវារដ្ឋបាល សាលារៀន និងសេវាសុខាភិបាលមួយចំនួនក៏បានឱ្យដំណើរការឡើងវិញផងដែរ៕
ប្រភព៖ ក្រសួងព័ត៌មាន