ក្រសួងរៀបចំដែនដី និងសមាគមអតីតយុទ្ធជន ពិភាក្សាជ្រើសរើសទីតាំងសាងសង់ផ្ទះជូនបងប្អូនជនភៀសសឹកតាមបណ្តោយព្រំដែន

(រាជធានីភ្នំពេញ)៖ តាមការចុះផ្សាយពី អគ្គនាយកដ្ឋានវិទ្យុជាតិកម្ពុជា កាលពីល្ងាចថ្ងៃទី ២៦ ខែមករា ឆ្នាំ ២០២៦ បានឱ្យដឹងថា ក្រសួងរៀបចំដែនដី នគរូបនីយកម្ម និងសំណង់ បានរៀបចំកិច្ចប្រជុំអន្តរក្រសួង ដើម្បីពិភាក្សា និងស្វែងរកការឯកភាពគ្នាក្នុងការកំណត់តំបន់ដែលបានសិក្សារួច សម្រាប់ជ្រើសរើសទីតាំងរៀបចំសាងសង់ផ្ទះជូនបងប្អូនជនភៀសសឹកដែលរស់នៅតាមបណ្តោយព្រំដែន។

សមាសភាពចូលរួមកិច្ចប្រជុំដ៏មានសារៈសំខាន់នេះ ត្រូវបានដឹកនាំដោយមានការអញ្ជើញចូលរួមផ្ទាល់ពី៖ឯកឧត្តមនាយឧត្តមសេនីយ៍ គន់ គីម៖ ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា តំណាងក្រសួងសេដ្ឋកិច្ច និងហិរញ្ញវត្ថុ រដ្ឋបាលខេត្ត និងមន្ទីររៀបចំដែនដី នៃខេត្តគោលដៅទាំង៥ (ចូលរួមតាមរយៈប្រព័ន្ធអនឡាញ)។

គោលបំណងនៃកិច្ចប្រជុំគោលបំណងចម្បងនៃជំនួបនេះ គឺដើម្បីពិនិត្យលើលទ្ធផលនៃការសិក្សាដីធ្លីនាពេលកន្លងមក និងសម្រេចជ្រើសរើសទីតាំងដែលសមស្របបំផុត សម្រាប់ការរៀបចំជាភូមិឋាន និងផ្ទះសម្បែងជូនដល់បងប្អូនជនភៀសសឹក។ ការងារនេះជាផ្នែកមួយនៃគោលនយោបាយគាំពារ និងលើកកម្ពស់កម្រិតជីវភាពជូនដល់អ្នកដែលមានគុណបំណាច់ និងបងប្អូនដែលរស់នៅតំបន់ដាច់ស្រយាលតាមព្រំដែន។

ខេត្តគោលដៅទាំង ៥គម្រោងកំណត់ទីតាំង និងសាងសង់ផ្ទះនេះ នឹងត្រូវអនុវត្តនៅក្នុងភូមិសាស្ត្រខេត្តចំនួន ៥ រួមមាន៖ ខេត្តបាត់ដំបង ខេត្តបន្ទាយមានជ័យ ខេត្តពោធិសាត់ ខេត្តឧត្តរមានជ័យ និងខេត្តព្រះវិហារ។

តាមរយៈកិច្ចសហការរវាងក្រសួងរៀបចំដែនដី សមាគមអតីតយុទ្ធជន និងក្រសួងសេដ្ឋកិច្ច គម្រោងនេះរំពឹងថានឹងជួយឱ្យបងប្អូនជនភៀសសឹកមានជម្រកស្នាក់នៅសមរម្យ និងមានសុវត្ថិភាព ស្របតាមផែនការអភិវឌ្ឍន៍តំបន់ព្រំដែនរបស់រាជរដ្ឋាភិបាល៕

ប្រភព៖ អគ្គនាយកដ្ឋានវិទ្យុជាតិកម្ពុជា