សម្ដេចធិបតី ហ៊ុន ម៉ាណែត ជំរុញឱ្យពន្លឿនការកែទម្រង់ស៊ីជម្រៅលើវិស័យសេដ្ឋកិច្ច និងការពារជាតិ ដើម្បីឆ្លើយតបនឹងហានិភ័យសកល

(រាជធានីភ្នំពេញ)៖ យោងទៅតាមការចុះផ្សាយរបស់ ក្រសួងព័ត៌មាន នៅថ្ងៃទី ៣ ខែឧសភា ឆ្នាំ ២០២៦ នេះ បានឱ្យដឹងថា សម្ដេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជំរុញឱ្យពន្លឿនការកែទម្រង់ស៊ីជម្រៅលើវិស័យសេដ្ឋកិច្ច និងការពារជាតិ ដើម្បីឆ្លើយតបនឹងហានិភ័យសកល។

ក្នុងឱកាសអញ្ជើញជាអធិបតីក្នុងពិធីសម្ពោធអគារថ្មី និងប្រគល់សញ្ញាបត្រជូនដល់គរុសិស្ស-និស្សិតនៃវិទ្យាស្ថានជាតិអប់រំកាយ និងកីឡា នាព្រឹកនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសង្កត់ធ្ងន់ថា កម្ពុជាចាំបាច់ត្រូវតែពន្លឿនការកែទម្រង់ឱ្យកាន់តែស៊ីជម្រៅ ស្របតាមពាក្យស្លោក «មុជឱ្យជ្រៅ ទៅឱ្យឆ្ងាយ»។

សម្ដេចធិបតីបានថ្លែងថា ក្នុងបរិការណ៍ពិភពលោកដែលពោពេញដោយហានិភ័យ និងភាពមិនប្រាកដប្រជា ការពង្រឹងវិស័យសេដ្ឋកិច្ច និងវិស័យការពារជាតិ គឺជាអាទិភាពបំផុត។ ទន្ទឹមនឹងនេះ សម្ដេចបានបញ្ជាក់ថា ការបន្តពូនជ្រុំ និងអភិវឌ្ឍធនធានមនុស្ស គឺជាគន្លឹះដ៏សំខាន់ក្នុងការសម្រេចបាននូវយុទ្ធសាស្ត្រអភិវឌ្ឍជាតិឱ្យកាន់តែរឹងមាំ និងមានចីរភាព។

គួរបញ្ជាក់ថា ក្រៅពីការថ្លែងសារនយោបាយ និងសេដ្ឋកិច្ចដ៏មានសារៈសំខាន់នេះ សម្ដេចនាយករដ្ឋមន្ត្រីក៏បានអបអរសាទរចំពោះសមិទ្ធផលថ្មីៗ និងជោគជ័យរបស់គរុសិស្ស-និស្សិតផ្នែកអប់រំកាយ ដែលនឹងក្លាយជាសសរទ្រូងក្នុងការអភិវឌ្ឍវិស័យកីឡារបស់ជាតិទៅថ្ងៃអនាគតផងដែរ៕

ប្រភព៖ ក្រសួងព័ត៌មាន