ម្ចាស់គ្លីនិកនៅបង់ក្លាដែសច្រើនរូបត្រូវបានឃាត់ខ្លួន ក្រោយចេញលទ្ធផលតេស្ដកូវីដ១៩ក្លែងក្លាយ
- July 17, 2020
ម្ចាស់គ្លីនិកនៅប្រទេសបង់ក្លាដែសមួយរូបបន្ថែមទៀតត្រូវប៉ូលិសឃាត់ខ្លួនក្រោយពីចេញវិញ្ញាបនបត្របញ្ជាក់លទ្ធផលតេស្ដជំងឺ COVID-19 ក្លែងក្លាយដល់អតិថិជនរបស់ខ្លួន ។ គ្រូពេទ្យរូបនេះមានឈ្មោះ Mohammad Shahed អាយុ៤២ឆ្នាំ ជាម្ចាស់គ្លីនិក Regent Hospital ត្រូវបានឃាត់ខ្លួនកាលពីថ្ងៃទី១៥ ខែកក្កដា ពេលកំពុងរត់គេចទៅប្រទេសឥណ្ឌាក្រោយពីប៉ូលិសតាមចាប់រយៈពេល៩ថ្ងៃ ដោយចោទថាបានចេញវិញ្ញាបនបត្រសុខភាពទាក់ទងទៅនឹងលទ្ធផលតេស្ដជំងឺ COVID-19 ក្លែងក្លាយ និងមិនបានធ្វើតេស្ដត្រឹមត្រូវ។ បុរសរូបនេះគឺជាមនុស្សម្នាក់ក្នុងចំណោមមនុស្ស១២នាក់ផ្សេងទៀតដែលត្រូវបានអាជ្ញាធរចាប់ខ្លួនទាក់ទងទៅនឹងការឆបោកនេះ។
គ្លីនិកទាំងពីររបស់គ្រូពេទ្យរូបនេះបានធ្វើតេស្ដ COVID-19 លើមនុស្ស១០ ៥០០នាក់ដែលក្នុងនោះមាន៤ ២០០នាក់បានធ្វើតេស្ដត្រឹមត្រូវ និង៦ ៣០០នាក់ទៀតគឺផ្តល់វិញ្ញាបនបត្របញ្ជក់សុខភាពដោយមិនបានធ្វើតេស្ដទេ។ ក្រៅពីចេញវិញ្ញាបនបត្រក្លែងក្លាយ មន្ទីរពេទ្យរបស់ជនសង្ស័យខាងលើក៏បានយកល្អថ្លៃព្យាបាលពីអ្នកជំងឺទាំងដែលព្រមព្រៀងជាមួយរដ្ឋាភិបាលថានឹងផ្តល់ការព្យាបាលដោយឥតគិតថ្លៃផងដែរ។ លោក Shahed មិនមែនជាមនុស្សដំបូងដែលប៉ូលិសបានឃាត់ខ្លួនចំពោះការឆបោកនេះទេ។ កាលពីសប្ដាហ៍មុន ក៏មានម្ចាស់មន្ទីរពេទ្យឯកជនត្រូវបានឃាត់ខ្លួនពាក់ព័ន្ធនឹងការចេញវិញ្ញាបនបត្រសុខភាពក្លែងក្លាយដោយមិនបានតេស្ដត្រឹមត្រូវនេះដែរ។
អ្នកជំនាញបានព្រមានថាការចេញលិខិតក្លែងក្លាយបែបនេះអាចធ្វើឲ្យស្ថានភាពឆ្លងក្នុងប្រទេសកាន់តែអាក្រក់ថែមទៀតនិងអាចប៉ះពាល់យ៉ាងធ្ងន់ធ្ងរដល់អ្នកត្រូវទៅធ្វើការនៅប្រទេសផ្សេងផងដែរ។ គិតមកថ្ងៃទី១៧ ខែកក្កដា នេះ ប្រទេសបង់ក្លាដែសមានអ្នកឆ្លងសរុបជិត២០ម៉ឺនករណី ក្នុងនោះអ្នកជាសះស្បើយជាង ១០ម៉ឺននាក់ និងអ្នកស្លាប់ជាង២ ៤០០នាក់។
លោកគ្រូពេទ្យ Mohammad Shahed
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: