ភ្លៀងធ្លាក់ខ្លាំង និងទឹកជំនន់នៅទូទាំងប្រទេសកូរ៉េខាងជើង បានបណ្ដាលឱ្យពលរដ្ឋយ៉ាងហោចណាស់ ២២នាក់ស្លាប់ និង ៤នាក់ កំពុងបាត់ខ្លួន

ភ្លៀងធ្លាក់ខ្លាំងនិងទឹកជំនន់ពាសពេញប្រទេសកូរ៉េខាងជើង ត្រូវបានគេរាយការណ៍ថា បានបណ្តាលឱ្យមនុស្សចំនួន ២២ នាក់ស្លាប់ និង ៤ នាក់ផ្សេងទៀតកំពុងបាត់ខ្លួន។ សហព័ន្ធកាកបាទក្រហមនិងអឌ្ឍចន្ទក្រហមអន្តរជាតិ បានប្រាប់ NHK នៅថ្ងៃសុក្រនេះថា ក្រុមរបស់ខ្លួនត្រូវបានមន្រ្តីកូរ៉េខាងជើងជូនដំណឹងអំពីចំនួនអ្នកស្លាប់ទាំងនេះ។ កាសែតរបស់គណបក្សកាន់អំណាចខាងជើងក៏បាននិយាយដែរថា សមាជិកនៃការិយាល័យនយោបាយត្រូវបានគេជូនដំណឹងកាលពីថ្ងៃព្រហស្បតិ៍នេះ ដោយបញ្ជាក់ថាគ្រោះមហន្តរាយនេះបានបណ្តាលឱ្យផ្ទះយ៉ាងហោចណាស់ ១៦,៦៨០ខ្នង ខូចខាត ឬលិចលង់។

បើតាមរបាយការណ៍ Rodong Sinmun បានបន្ថែមទៀតថា លោក គីម ជុងអ៊ុន និយាយថានឹងមិនស្វែងរកជំនួយពីខាងក្រៅដើម្បីស្តារពីការខូចខាតក្នុងប្រទេសខ្លួននោះទេ ហើយរក្សាព្រំដែនរបស់ខ្លួនដដែល ដើម្បីទប់ស្កាត់ហានិភ័យជំងឺ COVID-19។ យ៉ាងណាក៏ដោយកាសែតនេះមិនបានប្រាប់ពីចំនួនអ្នកស្លាប់ និងរបួស ដោយសារទឹកជំនន់នេះទេ។ ហើយក្រុមអ្នកសង្កេតការណ៍និយាយថា បណ្តាញសារព័ត៌មានកូរ៉េខាងជើងមួយនេះមិនរាយការណ៍ព័ត៌មានលម្អិតនៃគ្រោះមហន្តរាយ ដើម្បីបញ្ចៀសការព្រួយបារម្ភជាសាធារណៈ៕

អត្ថបទ៖ លីដា
ប្រភព៖ NHK