ចិននៅកំពង់សោមព្រួតគ្នាវាយជនបរទេសបែកមុខបែកមាត់ ល្បីដល់សារព័ត៌មានបរទេសចុះផ្សាយ

បុរសជនជាតិបរទេសម្នាក់មានឈ្មោះ Paul Farrell ត្រូវបានជនជាតិចិនមួយក្រុមព្រួតគ្នាវាយរហូតដល់បែកមុខបែកមាត់ កាលពីថ្ងៃទី២៧ ខែឧសភា កន្លងទៅនៅ បារ មួយកន្លែងនៅក្នុងខេត្តព្រះសីហុន នេះបើយោងតាមការចុះផ្សាយរបស់សារព័ត៌មានបរទេស។

ក្រុមជនជាតិចិន ដែលជាជនបង្ក បានអង្គុយនៅជិតជនរងគ្រោះឈ្មោះ Paul ហើយក្រោយមកពួកចិនទាំងនោះបានឃើញនៅលើថ្ងាសរបស់ជនរងគ្រោះមានសាក់ជាអក្សរតៃវ៉ាន់ ទើបធ្វើឲ្យជនជាតិចិនទាំងម្នាក់ក្នុងចំណោមគ្នីគ្នាប្រមាណ១០នាក់បានស្រែកថា “Taiwan, China” (ដែលពាក្យនេះចង់បានន័យថា តៃវ៉ាន់ជាផ្នែកមួយរបស់ចិន) ប៉ុន្តែជនរងគ្រោះបានស្រែកតបវិញថា “Taiwan, Taiwan” (ចង់សំដៅថា តៃវ៉ាន់ជាកោះឯករាជ្យខ្លួនឯង) ដែលនេះហើយទើបធ្វើឲ្យក្រុមពួកចិនទាំងនោះខឹងសម្បារ ហើយនាំគ្នាព្រួតវាយជនរងគ្រោះយ៉ាងដំណំតែម្តង។

ក្រោយកើតហេតុ ជនរងគ្រោះ Paul Farrell បានឲ្យដឹងនៅលើបណ្តាញសង្គមរបស់ខ្លួនថា ខ្លួនសាកអក្សរតៃវ៉ាន់នៅលើថ្ងាសបែបនេះតាំងពីខែតុលា ឆ្នាំ២០១៧ មកម្ល៉េះ ដោយសារតែពេលនោះស្រវឹងខ្លាំង។ ក្រោយកើតមានហេតុការណ៍នេះ លោកមានការសោកស្តាយយ៉ាងខ្លាំង ដោយនិយាយថា ការសាក់រូបនៅលើមុខមិនមានជារឿងល្អឡើយ ហើយលោកនឹងលុបស្នាមសាក់នោះចេញ៕

អត្ថបទ៖ ឌី
ប្រភព៖ nextshark