បុកគេខ្ទេចឡានខ្លួនឯងហើយត្រូវសងគេទៀត! រថយន្ត Prius ព្រលះរថយន្ត Hyundai កំពុងចតស្ងៀម ពីក្រោយពេញទំហឹង បណ្ដាលឲ្យរងការខូចខាតយ៉ាងដំណំ

ភ្នំពេញ៖ បុរសម្នាក់ជាជនជាតិចិនបានបើករថយន្តម៉ាក Prius មួយគ្រឿង ជ្រុលទៅបុករថយន្ត Hyundai ដឹកទំនិញដែលកំពុងចតនៅស្ងៀមលើចិញ្ចើមផ្លូវ ពីក្រោយពេញទំហឹង បណ្ដាលឲ្យរថយន្ត Prius ខ្ទេចមុខចំហៀងខាងស្ដាំ រងការខូចខាតយ៉ាងដំណំ។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១០:០០នាទីយប់ ថ្ងៃទី១៣ ខែកញ្ញា ឆ្នាំ២០២០នេះ នៅតាមបណ្ដោយផ្លូវឌួងងៀប (ហៅផ្លូវ៣០ម៉ែត្រ) ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

តាមប្រភពព័ត៌មាន បានឲ្យដឹងថា នៅមុនពេលកើតហេតុ គេបានឃើញបុរសម្នាក់ដែលជាជនជាតិចិន បើករថយន្តមួយគ្រឿងម៉ាក TOYOTA Prius ពណ៌ស ពាក់ស្លាកលេខភ្នំពេញ 2AW-4658 ធ្វើដំណើរក្នុងទិសដីពីលិចទៅកើត ខណៈមកដល់ចំណុចកើតខាងលើ ដោយស្ថានភាពផ្លូវងងឹតផងនោះ ក៏ជ្រុលចង្កូតទៅបុកពីក្រោយរថយន្តដឹកទំនិញមួយគ្រឿងម៉ាក Hyundai ពាក់ស្លាកលេខព្រះសីហនុ 3A-6370 ដែលកំពុងចតស្ងៀមលើចិញ្ចើមផ្លូវ ពេញទំហឹង បណ្ដាលឲ្យរថយន្ត Prius ខ្ទេចមុខចំហៀងខាងស្ដាំ រងការខូចខាតយ៉ាងដំណំ ។ តែសំណាងល្អមិនបង្ករឲ្យនណារម្នាក់ រងរបួសនោះទេ ។

ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ក៏បានឲ្យតំណាងភាគីរថយន្តទាំងសងខាង ធ្វើការសម្របសម្រួលគ្នាមួយជំហានសិន ក្រោយមកភាគីខាងរថយន្ត Prius ព្រមចេញថ្លៃខូចខាតទៅអោយភាគីខាងរថយន្តដឹកទំនិញ ចំនួន ៤៥០$ ដើម្បីបញ្ចប់រឿងតែម្ដង ៕

ប្រភព & អត្ថបទ៖ បងម៉េង ខ្មែរណូត