ម្នាក់ទៀតហើយ! ខឹងសមត្ថកិច្ចផាកពិន័យល្មើសច្បាប់ចរាចរណ៍ បែរបង្ហោះវីដេអូជេរប្រមាថ មើលងាយសមត្ថកិច្ច ចុងក្រោយចូលខ្លួនសុំទោសជាសាធារណៈ និងធ្វើកិច្ចសន្យាឈប់ប្រព្រឹត្តបែបនេះទៀត
បន្ទាប់ពីបានឃើញការចុះផ្សាយនៅលើគណនីហ្វេសបុកឈ្មោះ BonLinll និងបណ្តាញសង្គម Tik Tok កាលពីថ្ងៃទី២៧ ខែមករា ឆ្នាំ២០២១ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានសហការជាមួយអធិការដ្ឋាននគរបាលខណ្ឌចំការមន ដើម្បីធ្វើការស្រាវជ្រាវ និងស្វែងរកបុគ្គលដែលផុសព័ត៌មានមិនពិត ដោយបាននិយាយមើលងាយ ជេរប្រមាថ និងចោទប្រកាន់មកលើសមត្ថកិច្ច ផ្ទុយពីការពិតទាំងស្រុង រហូតដល់ថ្ងៃទី២៩ ខែមករា ឆ្នាំ២០២១ ។
សមត្ថកិច្ចក៏បានស្រាវជ្រាវរកឃើញបុគ្គលនេះ ហើយឈ្មោះ ពៅ រតនា ភេទប្រុស អាយុ២៨ឆ្នាំ ក៏បានចូលខ្លួនមកបកស្រាយបំភ្លឺ និងទទួលកំហុសរបស់ខ្លួនដែលបានប្រើប្រាស់គណនីហ្វេសបុកឈ្មោះ BonLinII និងTikTok ជាវីដេអូ ធ្វើការបង្ហាះពត៌មានមិនពិត ដោយបាននិយាយខុសពីការពិតទាំងស្រុង ក្នុងគោលបំណងអាក្រក់មើលងាយ ចោទប្រកាន់ និងបង្ខូចដល់កិត្តិយសរបស់សមត្ថកិច្ច បន្ទាប់ពីបុគ្គលរូបនេះត្រូវបានសមត្ថកិច្ចធ្វើការផាកពិន័យដោយបានល្មើសច្បាប់ចរាចរណ៍ (ពុំបានពាក់មួកសុវត្ថិភាពក្នុងពេលបើកបរ ) នាថ្ងៃទី២៥ ខែមករា ឆ្នាំ២០២១ វេលាម៉ោង ១៣និង០០នាទីរសៀល ត្រង់ចំនុចរង្វង់មូលផ្សារដើមថ្កូវ បន្ទាប់ពីសមត្ថកិច្ចបានធ្វើការផាកពិន័យត្រឹមត្រូវតាមច្បាប់ បុគ្គលរូបនេះក៏មានការខឹង និងខ្វះការពិចារណាក៏បានបង្ហាះសារជាវីដេអូលើហ្វេសបុកនិង TikTok របស់ខ្លួន នូវព័ត៌មានមិនពិត ដែលធ្វើឲ្យប្រជាពលរដ្ឋមានការយល់ច្រឡំ កាលពីថ្ងៃទី២៥ ខែមករា ឆ្នាំ២០២១ ដែលមានខ្លឹមសារប្រមាទមើលងាយ និងធ្វើឲ្យប៉ះពាល់ដល់កិត្តិយសសេចក្តីថ្លៃថ្នូររបស់សមត្ថកិច្ចនគរបាលជាតិទាំងមូលផងដែរ ។
ម្ចាស់ហ្វេសបុក និងTikTok រូបនេះបានសារភាព ទទួលស្គាល់កំហុស និងសូមសន្យាថាឈប់ប្រព្រឹត្តអំពើបែបនេះតទៅហើយ។ អាស្រ័យហេតុនេះសូមបងៗសមត្ថកិច្ចក៏ដូចជាប្រជាពលរដ្ឋទួទៅមេត្តាយោគយល់និងអនុគ្រោះលើកលែងទោសដល់រូបគាត់ផង។
ជាចុងបញ្ចប់ ម្ចាស់ហ្វេបុករូបនោះសូមសំណូមពរដល់បងប្អូនប្រជាពលរដ្ឋទាំងអស់ចូលរួមគោរពច្បាប់ចរាចរណ៏ឲ្យបានគ្រប់ៗគ្នាដើម្បីការពារអាយុជីវិតទ្រព្យសម្បត្តិរបស់ខ្លួនឯងនិងអ្នកដ៏ទៃ ។
ក្រោយពីបានចូលខ្លួនមកសារភាពកំហុស និងសុំទោសជាសាធារណ: ក៏ដូចជាការធ្វើការណែនាំអប់រំ ធ្វើកិច្ចសន្យារួមមក សមត្ថកិច្ចក៏បានអនុញ្ញាតឲ្យបុគ្គលរូបនេះត្រឡប់ទៅគេហដ្ឋានវិញ ប៉ុន្តែប្រសិនបើនៅមានករណីដូច្នេះជាលើកទី២ សមត្ថកិច្ចនឹងអនុវត្តតាមនីតិវីច្បាប់ ៕
ប្រភព៖ អគ្គស្នងការដ្ឋាននគរបាលជាតិ