យោងតាមការចុះផ្សាយរបស់សារព័ត៌មាន BBC បានឱ្យដឹងថា អនុសេនីយ៍លោក Tom Moore មានវ័យ ១០០ឆ្នាំ ដែលធ្លាប់បានរៃអង្គាសប្រាក់ចំនួន ៣៣ លានផោន ជួយដល់សេវាសុខភាពជាតិអង់គ្លេស ឬហៅកាត់ថា NHS ត្រូវបានគេបញ្ជូនទៅមន្ទីរពេទ្យ Bedford បន្ទាប់ពីលោកបានធ្លាក់ខ្លួនឈឺ និងត្រូវការជំនួយក្នុងការដកដង្ហើម។ កូនស្រីរបស់លោកបានរាយការណ៍ថា លោកតាចាប់ផ្ដើមទទួលការព្យាបាលជំងឺរលាកសួតកាលពីប៉ុន្មានសប្តាហ៍មុន ហើយកាលពីសប្តាហ៍មុននេះ គាត់ក៏បានធ្វើតេស្តវិជ្ជមានជាមួយជំងឺ COVID-19 បន្ថែមទៀត។

លោកស្រី Ingram-Moore ដែលត្រូវជាកូនស្រីរបស់លោកតា បាននិយាយថា ឪពុករបស់គាត់មិនបានទទួលការព្យាបាលក្នុងបន្ទប់ ICU នោះទេ។ អ្នកនាំពាក្យក៏បាននិយាយថា លោកតា Tom Moore មិនទាន់បានទទួលវ៉ាក់សាំងបង្ការជំងឹ COVID-19 នោះទេ ដោយសារគាត់កំពុងមានបញ្ហារលាកសួតស្រាប់។ ជម្រាបដែរថាអតីតយុទ្ធជនកងទ័ពរូបនេះ ទទួលបានការចាប់អារម្មណ៍តាមរយៈការដើរ ១០០ជុំ នៅសួនក្នុងផ្ទះរបស់គាត់នៅឯវីឡា Marston Moretaine នៃ Bedfordshire ខោនធី នៅមុនថ្ងៃខួបកំណើតគម្រប់ ១០០ឆ្នាំ ហើយក៏ចំអំឡុងពេលមានការផ្ទុះឡើងដំបូងនៃជំងឺ COVID-19 ផងដែរ។

ព្រះមហាក្រត្រីយានីនៃចក្រភពអង់គ្លេស Elizabeth II ក៏បានព្រះរាជទានគ្រឿងឥស្សរិយយសថ្នាក់ «អស្សឬទ្ធិ» ឱ្យលោកតាទៀតផង។ ហើយឥឡូវនេះទាំងតារា កីឡាករ អ្នកនយោបាយ និងពលរដ្ឋអង់គ្លេសដទៃទៀត កំពុងជូនពរលោកតាឱ្យឆាប់ជាសះស្បើយពីជំងឺទាំងនេះ៕

អត្ថបទ៖ លីដា
ប្រភព៖ BBC