វៀតណាម៖ ទីក្រុងហាណូយនឹងបើកការធ្វើតេស្ដសាកល្បងរកជំងឺ COVID-19 នៅក្នុងសហគមន៍ទ្រង់ទ្រាយធំមួយ នៅតាមកន្លែងដែលជនបរទេសរស់នៅនិងមានការប្រមូលផ្តុំច្រើន ដែលជាកិច្ចខិតខំប្រឹងប្រែងថ្មីមួយទៀត ដើម្បីការពារការរីករាលដាលនៃជំងឺ COVID-19 ពីករណីនាំចូល។ ក្រសួងសុខាភិបាលបាននិយាយថា ការធ្វើតេស្តដែលនឹងចាប់ផ្តើមនៅថ្ងៃព្រហស្បតិ៍ គឺដើម្បីកំណត់រាល់ករណីនៃការឆ្លងឱ្យបានឆាប់បំផុត ជាពិសេសអ្នកដែលមិនមានប្រភពនៃការចម្លងច្បាស់លាស់។

អ្នកដែលត្រូវបានសាកល្បងនឹងរាប់បញ្ចូលទាំងប្រជាជនដែលរស់នៅ និងធ្វើការនៅក្នុងតំបន់ដែលមានហានិភ័យខ្ពស់នៃការឆ្លងដូចជា៖ រោងចក្រ និងសួនឧស្សាហកម្ម ដែលជនបរទេសធ្វើការ ឬរស់នៅកម្មករនៅហាងអាហារដែលបម្រើជនបរទេស និងអ្នកដំណើរដែលត្រូវជ្រើសរើសដោយចៃដន្យនៅស្ថានីយ៍រថយន្តក្រុងធំៗនៅជុំវិញទីក្រុង។ នាយកដ្ឋាននេះរំពឹងថា នឹងធ្វើតេស្តមនុស្សប្រហែល ៤,០០០ នាក់ ពីគ្រប់ក្រុមមនុស្ស ហើយការធ្វើតេស្តនេះនឹងត្រូវធ្វើឡើងជា ២ ដំណាក់កាល គឺថ្ងៃទី ១១-១២ និង ១៥-១៩ ខែមីនា។

ការផ្តោតលើជនបរទេសនេះ គឺដោយសារតែប្រទេសវៀតណាមអនុញ្ញាតឱ្យអ្នកជំនាញ និងកម្មករជំនាញចូលមកក្នុងប្រទេសខ្លួន ដែលវាអាចបង្កការគំរាមកំហែងនៃការឆ្លងរាលដាល។ ជាក់ស្ដែងថ្មីៗនេះជនជាតិជប៉ុនម្នាក់ដែលបានចូលប្រទេសវៀតណាមនៅថ្ងៃទី១៧ ខែមករា និងត្រូវបានដាក់ឱ្យនៅដាច់ដោយឡែកនៅទីក្រុងហូជីមិញមុនពេលធ្វើដំណើរទៅក្រុងហាណូយបានស្លាប់ដោយសារជំងឺ COVID-19 នៅសណ្ឋាគារមួយនៅក្នុងស្រុក Tay Ho ។

ជម្រាបដែរថា នៅក្នុងការផ្ទុះជំងឺក្នុងស្រុកចុងក្រោយដែលបានផ្ទុះឡើងនៅថ្ងៃទី២៨ ខែមករា មានករណីចំនួន ៨៩៣ នៅក្នុងទីក្រុង និងខេត្តចំនួន ១៣ រួមមាន ៣៥ ករណី នៅហាណូយ។ ប៉ុន្តែរដ្ឋធានីហូជីមិញ និងកន្លែងចំនួន ៨ ផ្សេងទៀត បានឆ្លងកាត់អស់រយៈពេលជាង ៣ សប្តាហ៍ ដោយគ្មានករណីថ្មីត្រូវបានកត់ត្រានោះទេ ប៉ុន្តែពួកគេនៅតែបង្កើនការប្រុងប្រយ័ត្ន៕

អត្ថបទ៖​ លីដា
ប្រភព៖ VNexpress