យោងតាមការចុះផ្សាយរបស់សារព័ត៌មាន Daily Mail នៅថ្ងៃសុក្រ ទី១៩ ខែមីនា ឆ្នាំ២០២១ បានរាយការណ៍ថា លោក Boris Johnson បានអញ្ជើញទៅចាក់វ៉ាក់សាំងបង្ការជំងឺ COVID-19  ដែលបង្កើតឡើងដោយក្រុមហ៊ុន AstraZeneca សហការជាមួយសាកលវិទ្យាល័យ Oxford ។ រូបភាពនៅកន្លែងចាក់ថ្នាំបង្ហាញថា នាយករដ្ឋមន្រ្តីវ័យ ៥៦ឆ្នាំរូបនេះ បានលើកមេដៃឡើងទាំងសងខាងភ្លាម ដើម្បីបញ្ជាក់ពីការចាក់វ៉ាក់សាំងដោយជោគជ័យ បន្ទាប់ពីគាត់បានទៅចាក់វានៅឯ St Thomas កណ្ដាលទីក្រុងឡុងដ៍។

ដើម្បីជាការជំរុញទឹកចិត្តពលរដ្ឋឱ្យមកចូលរួមចាក់វ៉ាក់សាំងបង្ការជំងឺ COVID-19 បន្ថែមទៀត លោក Boris Johnson បាននិយាយថា គាត់គ្មានអារម្មណ៍ប្លែកអ្វីនៅពេលចាក់វ៉ាក់សាំងនោះទេ។ ជាមួយនឹងការទទួលវ៉ាក់សាំងរបស់ AstraZeneca ដោយខ្លួនលោកផ្ទាល់ លោកនាយករដ្ឋមន្ត្រីជឿជាក់ថា វានឹងជាសារមួយបញ្ជាក់ថា វ៉ាក់សាំងនេះគឺមានប្រសិទ្ធភាពនិងសុវត្ថិភាពក្នុងការប្រើប្រាស់ជាធម្មតា ក្រោយពីមានភាពចម្រូងចម្រាសប៉ុន្មានសប្ដាហ៍កន្លងមកនេះ ដែលបាននិយាយថា វ៉ាក់សាំងរបស់ AstraZeneca ធ្វើឱ្យអ្នកចាក់រួចមានបញ្ហាកកឈាម៕

អត្ថបទ៖ លីដា
ប្រភព៖ Daily Mail