សមត្ថកិច្ចចុះបិទក្លឹបកំសាន្ត Coloso KTV បន្ទាប់ពីលេចធ្លាយវីដេអូរាំអាក្រាតកាយ
ភ្នំពេញ ៖ ក្រុមអ្នកពាក់ព័ន្ធក្នុងវីដេឃ្លីបរាំស្រាតដ៏ស្រើបស្រាល ក្នុងបន្ទប់ការ៉ា Coloso KTV ត្រូវបានបែកធ្លាយ និងកំពុងល្បីល្បាញនោះនឹងត្រូវបានកោះហៅឲ្យចូលខ្លួនមកបំភ្លឺជុំវិញរឿងអាស្រូវមួយនេះជាបន្តបន្ទាប់ ក្រោយពីកម្លាំងសមត្ថកិច្ចចម្រុះខណ្ឌចំការមន ដែលដឹកនាំសម្របសម្រួលដោយលោកស្រី កែវ សុគន្ធា ព្រះរាជ្ញារង អមសាលាដំបូងរាជធានីភ្នំពេញ សម្រេចបិតអាជីវកម្មជាបណ្តោះអាសន្ន។
ក្នុងកិច្ចប្រតិបត្តិការបិទកន្លែងកំសាន្តដ៏ស្រើបស្រាល(រាំស្រាត)នេះ មានការរួមពលោក ព្រុំ សំខាន់ អភិបាលខណ្ឌចំការមន លោកស្រី គឹម វណ្ណា ប្រធានមន្ទីរ ទេសចរណ៍រាជធានីភ្នំពេញ កម្លាំងនគរបាល កងរាជអាវុធ អាជ្ញាធរពាក់ព័ន្ធ ដែលដឹកនាំសម្របសម្រួលដោយផ្ទាល់ពីលោកស្រី កែវ សុគន្ធា ព្រះរាជអាជ្ញារង បានចុះពិនិត្យទីតាំងខារ៉ាអូខេ Coloso KTV ស្ថិតនៅផ្លូវ៣៦០ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ ដែលមានការរាំអាស់អាភាស ហើយក្រុមការងារបានសម្រេចបិតជាបណ្តោះអាសន្ន។
លោក អ៊ីវ ថាវី ប្រធានការិយាល័យអន្តរនិស័យខណ្ឌចំការមន បានប្រាប់នៅព្រឹកថ្ងៃទី២៤ ខែកុម្ភៈ ឆ្នាំ២០១៨នេះថា «បន្ទាប់ពីមានវីដេអូអាសអាភាសន៍រាំស្រាតនៅការ៉ាអូខេ Coloso ក្នុងបន្ទប់ឈ្មោះអន្លង់ស្នេហ៍ ជាន់ទី៥ នៃមណ្ឌលនេះ ត្រូវបានបែកធ្លាយ និងបង្ហោះលើបណ្តាញទំនាក់ទំនងសង្គមហ្វេសប៊ុក ទើបលោក ឃួង ស្រេង អភិបាលរាជធានីភ្នំពេញ បានបញ្ជាឲ្យមកគណបញ្ជាការឯកភាពខណ្ឌចំការមន ដឹកនាំដោយលោកស្រី កែវ សុគន្ធា ព្រះរាជអាជ្ញារង សាលាដំបូងរាជធានីភ្នំពេញ បានចុះត្រួតពិនិត្យ និងធ្វើកំណត់ហេតុសម្រេចបិតអាជីវកម្មការ៉ាអូខេ Coloso នេះជាបណ្តោះអាសន្ន នៅវេលាម៉ោងជាង ២១យប់ ថ្ងៃទី២៣ ខែកុម្ភៈ ឆ្នាំ២០១៨នេះ»។
ប្រធានការិយាល័យអន្តរនិស័យរូបនេះ បានបញ្ជាក់ថា «គណៈកម្មការចម្រុះដឹកនាំដោយលោកស្រីព្រះរាជអាជ្ញារងបានសម្រេចបិតកន្លែងកំសាន្ត Coloso KTV ទាំង៣៤បន្ទប់ជាបណ្តោះអាសន្នហើយនៅព្រឹកថ្ងៃទី២៤ ខែកុម្ភៈ ទាំងមេការការ៉ាអូខេ អ្នកគ្រប់គ្រង និងអ្នកពាក់ព័ន្ធនឹងត្រូវហៅមកសាកសួរបំភ្លឺនៅអធិការដ្ឋានខណ្ឌចំការមន ហើយវិធានការបន្តទៀត គឺអាស្រ័យទៅលើលោកស្រី កែវ គុន្ធា ព្រះរាជអាជ្ញារងតែម្តង»។
សូមរម្លឹកថា វីដេអូឃ្លីបមួយដែលមានរយៈប្រមាណ ២នាទី ដែលនារីបម្រើសេវាការ៉ាអូខេវ័យក្មេងសាច់ទ្រលក់ទ្រលន់ម្នាក់រាំដោះអាវល្វែងខាងលើបញ្ចេញភាពស្រើបស្រាល ក្នុងខារ៉ាអូខេ Colosso នៅបន្ទប់ទី៥ លេខ៥០១ បន្ទប់ឈ្មោះ «អន្លង់ស្នេហ៍» ស្ថិតតាមផ្លូវលេខ៣៦០ សង្កាត់បឹងកេងកង៣ ខណ្ឌចំការមន រាជធានីភ្នំពេញ។
ក្នុងវីដេអូឃ្លីបរាំស្រើបស្រាលអាក្រាតកាយល្វែងខាងលើនេះ តួឯកស្រីមិនត្រូវបានគេស្គាល់ឈ្មោះនោះទេ ប៉ុន្តែបុរសវ័យកណ្តាលម្នាក់ដែលរាំអោបស្ទាបអង្អែលសព្វរៀងកាយឡើងក្តៅសាច់ជានាយនគរបាលជាន់ខ្ពស់នៃនាយកដ្ឋានសេដ្ឋកិច្ចក្រសួងមហាផ្ទៃ(ពាក់ស័ក្តិ៤កន្លះ) ហើយអ្នកដែលកំពុងមើលសកម្មភាព និងចូលរួមការសប្បាយជ្រុលហួសហេតុព្រោះតែអំណាចទឹកប្រាក់គឺជាឧកញ៉ាៗ៤ទៅ៥នាក់ទៀតសុទ្ធជាមេឈ្មួញរកស៊ីឈើល្បីៗប្រចាំភូមិភាគឦសាន្ត។
លោកវរសេនីយ៍ទោ ហាក់ សុខគា មន្ត្រីនគរបាលសេដ្ឋកិច្ចក្រសួងមហាផ្ទៃ ដែលតូឯកបានបំភ្លឺប្រាប់សារព័ត៌មានក្នុងស្រុកមួយ កាលពីថ្ងៃទី២៣ ខែកុម្ភៈ ឆ្នាំ២០១៨ កន្លងមកនេះថា«រឿងនេះគេលួចថតខ្ញុំ តាំងពី៥ទៅ៦ខែមុនមកម្ល៉េះ ដែលលោកទទួលស្គាល់ថា ជារូបគាត់ពិតប្រាកដ ហើយក៏មិនដល់ថ្នាក់ហួសហេតុពេកដែរ» ។
ក្រោយពីបែកធ្លាយនូវវីដេអូរាំស្រើបស្រាល ក្នុងបន្ទប់ការ៉ាអូខេ Coloso មហាជនបាននាំគ្នារិះគន់យ៉ាងខ្លាំងដល់អស់លោកអ្នកមានលុយមានងារជាឧកញ៉ាមួយក្តាប់តូច ប្រើអំណាចទឹកលុយជះទៅលើនារីបម្រើការងារជានារីការ៉ាអូខេ ដើម្បីបំពេញការសប្បាយរបស់ខ្លួនជ្រុលហួសហេតុពេកនាំឲ្យបាត់បង់តម្លៃនារីខ្មែរជាពិសេសប្រពៃណីវប្បធម៌ដ៏ផូផង់របស់ខ្មែរតែម្តង។ ដោយឡែកនារីបម្រើការងារក្នុងសេវាកំសាន្តនានាពេលខ្លះនាងមិនចង់ធ្វើបែបនេះនោះទេ ប៉ុន្តែដោយសារកាលៈទេសបង្ខំដូចជាត្រូវការប្រាក់ឬជាការបង្ខំណាមួយពីក្រុមអ្នកមានលុយតែម្តង ៕
