ក្រុមហ៊ុនឱសថអាមេរិក Pfizer និងដៃគូអាល្លឺម៉ង់ BioNTech ប្រកាសថា នឹងបរិច្ចាគវ៉ាក់សាំងបង្ការជំងឺកូវីដ១៩ ជូនដល់អត្តពលិក និងប្រតិភូ ដែលត្រូវចូលរួមព្រឹត្តិការណ៍អូឡាំពិកនៅប្រទេសជប៉ុន

ក្រុមហ៊ុនឱសថអាមេរិក Pfizer Inc និងដៃគូអាល្លឺម៉ង់ BioNTech SE បាននិយាយកាលពីថ្ងៃព្រហស្បតិ៍ថា ពួកគេនឹងបរិច្ចាគវ៉ាក់សាំងបង្ការជំងឺ COVID-19 ដែលពួកគេផលិតរួមគ្នា ជូនដល់អត្តពលិកនិងប្រតិភូរបស់ពួកគេ ដែលចូលរួមក្នុងព្រឹត្តិការណ៍អូឡាំពិក និងប៉ារ៉ាឡាំពិកទីក្រុងតូក្យូ។ ក្រុមហ៊ុនបាននិយាយថា ដូសដំបូងត្រូវបានគេរំពឹងថា នឹងត្រូវបញ្ជូនទៅប្រតិភូដែលចូលរួមនៅចុងខែឧសភា ជាមួយគោលដៅដើម្បីធានាថា គណៈប្រតិភូនឹងទទួលបាននូវដូសទី២ មុនពេលអញ្ជើញទៅដល់ទីក្រុងតូក្យូរបស់ប្រទេសជប៉ុន។

ផែនការនេះត្រូវបានដាក់ឱ្យអនុវត្តឡើង ក្រោយពេលដែលគណៈកម្មាធិការអូឡាំពិកអន្តរជាតិ (IOC) បានជួបប្រជុំជាមួយរដ្ឋាភិបាលជប៉ុន នៅក្រោយពេលដែលលោក Albert Bourla នាយកប្រតិបត្តិនៃក្រុមហ៊ុន Pfizer ស្ម័គ្រចិត្តថា នឹងផ្តល់វ៉ាក់សាំងដល់អត្តពលិក និងគណៈប្រតិភូរបស់ពួកគេ។ ដូច្នេះការបរិច្ចាគវ៉ាក់សាំងនេះគឺជាមធ្យោបាយមួយផ្សេងទៀត ដើម្បីជួយធ្វើឱ្យកីឡាអូឡាំពិក និងប៉ារ៉ាឡាំពិកទីក្រុងតូក្យូ២០២០ មានសុវត្ថិភាព និងសុវត្ថិភាពសម្រាប់អ្នកចូលរួមទាំងអស់។ ក្រុមហ៊ុន Pfizer និង BioNTech បាននិយាយថា ដូសដែលបានបរិច្ចាគនឹងបន្ថែមទៅលើវ៉ាក់សាំងដែលបានផ្តល់ក្រោមកិច្ចព្រមព្រៀងផ្គត់ផ្គង់ជាមួយប្រទេសនានានៅទូទាំងពិភពលោក ហើយនឹងមិនប៉ះពាល់ដល់កិច្ចព្រមព្រៀងដែលមានស្រាប់នោះទេ៕

អត្ថបទ៖ លីដា
ប្រភព​៖ NBC News