សួស្តីបងប្អូនទាំងអស់គ្នា ថ្ងៃនេះដែរយើងមានរូបមន្ត បន្លែខ្ចប់សាច់ជ្រូកបីជាន់ជាមួយនឹងទឹកត្រីកោះកុងពិសេស មកចែកជូនរសជាតិឆ្ងាញ់មិនចាញ់ហាងល្បីឡើយ តោះយើងមកមើលគ្រឿងផ្សំនិងវិធីធ្វើទាំងអស់គ្នា៖

*គ្រឿងផ្សំគ្រឿងខ្ចប់

1. សាច់ជ្រូកបីជាន់ ៣០០ក្រាម
2. គុយទាវសរសៃតូចស្រុះរួច ២០០ក្រាម
3. ខ្ទឹមសបំពងស្រួយ តាមចំណូលចិត្ត
4. បន្លែស្រស់តាមចំណូលចិត្ត

*គ្រឿងផ្សំទឹកត្រីកោះកុង

1. ឬសជីវ៉ាន់ស៊ុយ ៣ឬស
2. ខ្ទឹមស ៦គ្រាប់
3. ម្ទេសស្រស់ពណ៍ក្រហម ១០គ្រាប់
4. ទឹកក្រូចឆ្មា ២ស្លាបព្រាបាយ
5. ទឹកត្រី ១ ½ ស្លាបព្រាបាយ
6. ស្ករត្នោត ½ ស្លាបព្រាបាយ
7. ស្ករស ១ស្លាបព្រាកាហ្វេ
8. ទឹកសុទ្ធ ២ស្លាបព្រាបាយ

*វិធីធ្វើ

• ជាដំបូងយើងយកឬសជីវ៉ាន់ស៊ុយខ្ទឹមសបុកចូលគ្នាអោយម៉ត់ ក្រោយមកដាក់ម្ទេសស្រស់បុកចូលគ្នាអោយម៉ត់ល្មម
• ផ្សំរសជាតិដោយស្ករត្នោត ស្ករស ទឹកក្រូចឆ្មា ទឹកត្រី និងទឹកស្អាត កួរអោយចូលគ្នាល្អ រឺរហូតទាល់តែស្កររលាយល្អ ភ្លក់រសជាតិតាមចំណូលចិត្ត
• ក្រោយមកទៀតយកឆ្នាំងដាំទឹកអោយពុះដាក់អំបិលបន្តិច ដើម្បីកុំអោយសាច់ជ្រូកយើងសាបពេក រួចដាក់សាច់ជ្រូកបីជាន់ចូលទៅស្ងោរអោយឆ្អិនល្អ ក្រោយពីសាច់ជ្រូកឆ្អិនល្អហើយ យកមកហាន់ជាដុំៗល្មមញាំចំនួនពាក់កណ្តាល
• ក្រោយមកទៀតយើងយកសាច់ជ្រូកបីជាន់មួយផ្នែកទៀតមកចៀនអោយស្រួយ​និងលឿងល្អ
• រៀបចំបន្លែសាច់ និងគុយទាវសរសៃតូចរោយដោយខ្ទឹមសបំពង ទទួលទានជាមួយនិងទឹកត្រីដែលយើងបានបុកទុកជាការស្រេច។